Last Updated on 10/03/2026 by Anisa
Ministri i Jashtëm i Iranit, Abbas Araghchi, tha se Republika Islamike është gati të vazhdojë sulmet me raketa “për aq kohë sa të jetë e nevojshme”, duke iu përgjigjur kërcënimeve të Presidentit të SHBA-së, Donald Trump, i cili kishte deklaruar se lufta “do të përfundojë së shpejti”.
Araghchi theksoi në një intervistë për PBS se kjo është përgjigjja e Iranit ndaj operacioneve të SHBA-së dhe Izraelit, në ditën e 11-të të konfliktit. Ai nënvizoi se Irani nuk ka ndërmend të ndalojë sulmet deri në përmbushjen e qëllimeve të tij.
Lindja e Mesme është në zjarr për të 11-tën ditë, me Trumpin që kërcënon se do ta godasë Iranin “njëzet herë më fort”, nëse ndalon anijet cisternë të naftës në Ngushticën e Hormuzit, disa orë pasi deklaroi se lufta mund të përfundojë “shumë shpejt”, por shtoi se “nuk kemi fituar mjaftueshëm”.
Izraeli vazhdon sulmet ndaj Libanit dhe bombardimet e Teheranit, ku është goditur infrastruktura kritike e energjisë dhe karburantit. Irani përgjigjet me sulme të reja me raketa ndaj Izraelit, bazave amerikane në të gjithë Lindjen e Mesme dhe infrastrukturës energjetike në Gjirin Persik.
Irani këmbëngul në garancitë për mospërsëritjen e sulmeve si kusht për çdo ndërmjetësim
Zëdhënësja e qeverisë iraniane, Fatemeh Mohajerani, tha se çdo ndërmjetësim “duhet të jetë i kushtëzuar jo vetëm nga një armëpushim, por edhe nga një ndërprerje e plotë e sulmeve dhe sigurime se ato nuk do të përsëriten”.
“Kjo është një çështje që kërkohet seriozisht nga populli ynë sot dhe ata kanë nevojë për këtë siguri. Ne nuk e filluam luftën, por ne do ta përfundojmë atë”, tha ajo, sipas agjencisë të lajmeve Tasnim.
Kompania e naftës e Arabisë Saudite, Aramco, eksportuesi më i madh i naftës në botë, paralajmëroi sot se do të ketë “pasoja katastrofike” për tregjet globale të naftës nëse lufta në Iran vazhdon të prishë transportin detar në Ngushticën e Hormuzit.
Bllokada e Ngushticës ka shkaktuar probleme në sektorët e transportit detar dhe të sigurimeve dhe rrezikon të ketë një ndikim serioz në transportin ajror, bujqësinë, industrinë e automobilave dhe sektorë të tjerë, u tha gazetarëve drejtori ekzekutiv i Aramco-s, Amin Nasser.
Nasser vuri në dukje se rezervat globale të naftës janë në nivelin e tyre më të ulët në pesë vjet, duke shtuar se është thelbësore të rivendoset kalimi i sigurt nëpër Ngushticë.
“Do të ketë pasoja shkatërruese për tregjet globale të naftës dhe, sa më gjatë të zgjasë përçarja, aq më drastike do të jenë pasojat për ekonominë globale”, theksoi ai./fjala.al-A.D
