Një debat i fortë është zhvilluar në studio mes deputetit Tritan Shehu dhe analistëve Egon Loli dhe Marlind Laçi, ku në qendër ishte vlerësimi për ish-presidentin amerikan Donald Trump dhe koncepti i interesit kombëtar.
Debati nisi pas deklaratës së Shehut, i cili propozoi që Trump të vlerësohet me Çmimin Nobel për Paqen. Sipas tij, gjatë dy mandateve, Trump ka kontribuar në mbylljen e disa konflikteve, ka ndikuar në zhvillimet politike në Venezuelë duke dobësuar regjimin, si dhe ka vendosur paqe në Gaza. Ai shtoi se aktualisht po bëhen përpjekje edhe për ndalimin e luftës në Ukrainë, duke e cilësuar Trump si “president të paqes”.
Kjo deklaratë hasi menjëherë në kundërshtim nga Egon Loli, i cili vuri në pikëpyetje pozicionimin e Shehut, duke e pyetur nëse ai përfaqëson interesat e Shqipërisë apo të vendeve të tjera. Shehu iu përgjigj se është deputet i Parlamentit të Shqipërisë dhe se qëndrimet e tij lidhen me mbrojtjen e interesave të shqiptarëve.
Tritan Shehu: Trumpit t’i jepet çmimi Nobel për Paqen, ka mbyllur disa luftra. Shkatëroi një sistem diktatorial në Venezuelë. Ai regjim u dekapitua, hyri në një proces ndryshimi. Vendosi paqen në Gaza, ku askush tjetër nuk e ndaloi luftën. Po bën përpjekjet për të ndaluar luftën në Ukrainë. Presidenti Trump në dy mandatet e tij, ka qenë presidenti i paqes.
Egon Loli: O zoti Shehu t’ju pyes a jeni ju deputet dhe përfaqësues i parlamentit të Shqipërisë, apo të Izraelit, se nuk po ju kuptoj?
Tritan Shehu: Unë jam deputet i parlamentit të Shqipërisë dhe jo i Iranit.
Egon Loli: Çfarë lidhje ka?
Tritan Shehu: Ka lidhje, unë mbroj interesat e popullit shqiptar.
Marlind Laçi: Ti e ke kryetarin non-grata.
Tritan Shehu: Lëri këto gjëra. Interesat e shqiptarëve dhe të Kosovës, janë të lidhura me SHBA.
Marlind Laçi: Kur flisni për interesin kombëtar, krijoni neveri sepse nuk e keni artikuluar asnjëherë, sot na hiqeni nacionalist. Ajo shpurë në parlament, nuk njeh as interes kombëtar. E ktheni kalë karroce, më vjen për të qeshur, bëheni qesharakë. Si e ke përfaqësuar ti si deputet? Ke propozuar ndonjë rezolutë ti kundër Serbisë?
Tritan Shehu: Unë e kam propozuar.
Marlind Laçi: Po për shqiptarët e Çamërisë?
Tritan Shehu: Je krejt i paimformuar për zhvillimet politike në Shqipëri.