Qindra punonjës të transmetuesit publik australian, Australian Broadcasting Corporation, kanë nisur një grevë 24-orëshe, duke shkaktuar ndërprerje të programeve informative dhe transmetimeve live.
Kjo është hera e parë në 20 vite që stafi i këtij institucioni hyn në grevë, në shenjë proteste për pagat dhe kushtet e punës.
Me nisjen e grevës, programet live janë zëvendësuar përkohësisht me përmbajtje nga transmetuesi britanik BBC, ndërsa emisionet kryesore televizive dhe radiofonike pritet të transmetojnë ritransmetime gjatë gjithë ditës.
Greva vjen pas disa muajsh negociatash të pasuksesshme mes stafit dhe drejtuesve. Punonjësit kanë refuzuar ofertën e fundit, e cila parashikonte një rritje page prej 10% për tre vite dhe një bonus prej 1000 dollarësh australianë për një pjesë të stafit.
Sindikatat, përfshirë Media, Entertainment & Arts Alliance, e kanë cilësuar ofertën si të pamjaftueshme dhe nën nivelin e inflacionit, duke theksuar gjithashtu mungesën e garancive për sigurinë në punë.
Sipas tyre, bonusi nuk përfshin punonjësit me kontrata të përkohshme, duke rritur pakënaqësinë mes stafit.
Rreth një e treta e 4,500 punonjësve të ABC janë të sindikalizuar, ndërsa afro 1,000 prej tyre votuan në favor të veprimeve sindikale pas dështimit të bisedimeve.
Greva ka sjellë ndikim të menjëhershëm në transmetimet publike, duke nxjerrë në pah tensionet mes punonjësve dhe drejtuesve të një prej mediave më të rëndësishme në Australi./mxh