Last Updated on 04/05/2026 by EL
Filmi The Devil Wears Prada 2 ka shënuar një debutim të jashtëzakonshëm, duke arkëtuar 234 milionë dollarë në të gjithë botën vetëm në fundjavën e parë. Një nga faktorët kryesorë të këtij suksesi është rikthimi i kastit origjinal pas dy dekadash, si dhe një fushatë promovuese intensive që ka tërhequr vëmendjen globale.
Në qendër të këtij rikthimi është Meryl Streep, e cila, duke thyer rregullin e saj të kahershëm për të shmangur vazhdimet, ka mahnitur publikun edhe një herë me rolin ikonik të Miranda Priestly. Interesi është rritur edhe më shumë për shkak të afrimit të saj me Anna Wintour, figura që frymëzoi personazhin.
Dyshja madje u shfaq në kopertinën e majit 2026 të Vogue, duke forcuar lidhjen mes kinemasë dhe modës në një moment kyç për promovimin e filmit.
Megjithatë, surpriza më e madhe erdhi kur Streep refuzoi të marrë pjesë në Met Gala, një nga eventet më prestigjioze të modës në botë, ku pritej të ishte një nga figurat kryesore të mbrëmjes.
Sipas raportimeve nga mediat amerikane si Daily Mail dhe Page Six, vendimi i saj lidhet me përfshirjen e Jeff Bezos dhe Lauren Sánchez si sponsorë dhe bashkë-kryetarë nderi të eventit. Thuhet se familja Bezos ka paguar rreth 10 milionë dollarë – madje sipas disa burimeve edhe më shumë – për këtë rol.
Nga ana tjetër, përfaqësuesi i aktores ka sqaruar se Streep nuk ka marrë pjesë kurrë në këtë event, pavarësisht ftesave të vazhdueshme ndër vite, duke theksuar se Met Gala nuk përputhet me stilin e saj personal.
Ndër mungesat e mëdha këtë vit është edhe Zendaya, e cila nuk do të marrë pjesë për shkak të angazhimeve profesionale, pavarësisht se ka qenë një nga figurat më të spikatura të tapetit të kuq në edicionet e fundit.
Ndërkohë, emra si Kim Kardashian, Hailey Bieber, si dhe bashkë-prezantueset Beyoncé, Nicole Kidman dhe Venus Williams pritet të jenë në qendër të vëmendjes në një edicion që synon të hyjë në histori./et