Në vitin 2026, gara për të dhëna është po aq intensive sa një “gjueti moderne ari”, e nxitur nga rritja shpërthyese e inteligjencës artificiale (AI). Kompanitë teknologjike duan të dinë gjithçka: nga masa e xhinseve që vesh, te mënyra si fle, madje edhe cilat zona të një dyqani të tërheqin më shumë vëmendjen.
Në të njëjtën kohë, markat e modës po ndjekin personalizimin dhe e promovojnë atë si një përfitim që përmirëson eksperiencën e blerjes, si online ashtu edhe në dyqan fizik.
AI dhe etja për të dhëna
Premtimi i AI-së për të ardhmen e shitjes me pakicë bazohet në mbledhjen e sa më të madhe të të dhënave: rekomandime hiper-personalizuara, marketing i përshtatur dhe shërbim klienti në dyqane që parashikon nevojat e konsumatorit.
Kompanitë si Meta dhe Google janë në kërkim të vazhdueshëm të mënyrave të reja për të mbledhur më shumë të dhëna, pasi modeli i tyre ekonomik varet kryesisht nga reklamat. Këtë vit, ato kanë rritur investimet në ruajtjen e të dhënave me 77%, duke arritur një rekord prej 725 miliardë dollarësh.
Por sa më shumë që AI zhvillohet, aq më shumë të dhëna kërkohen për të konkurruar.
Konsumatorët: lodhje dhe mosbesim
Nga ana tjetër, konsumatorët po tregojnë lodhje dhe skepticizëm. Një sondazh i Vogue Business me lexues të Vogue dhe GQ tregon se vetëm 1% i konsiderojnë rekomandimet e AI-së “plotësisht të dobishme”, më pak se 25% u besojnë atyre, dhe vetëm 3% përdorin chatbot-et për frymëzim stili.
Shumë përdorues mendojnë se rezultatet janë të përgjithshme dhe jo të personalizuara, duke treguar se problemi kryesor është ende mënyra se si këto mjete funksionojnë.
Privatësia si luks i ri
Klientët e luksit, në veçanti, po zgjedhin gjithnjë e më shumë të mbrojnë privatësinë e tyre: duke refuzuar mbledhjen e të dhënave, reklamat e targetuara apo përdorimin e shërbime të enkriptuara.
Konsumatorët më të pasur dhe më të arsimuar janë më të vetëdijshëm për mënyrën se si funksionon personalizimi i bazuar në të dhëna, gjë që krijon sfida për markat luksoze që mbështeten në përvojë të personalizuar dhe “high-touch”.
Siç thotë Carol Aquino nga WGSN, gjithnjë e më shumë njerëz janë të vetëdijshëm për abuzimin me të dhënat personale.
“Nëse nuk paguan me para, po paguan me të dhëna”
Sipas Patricia Egger nga Proton, gjithçka varet nga zgjedhja: ose paguan me para, ose me të dhëna.
Ajo thekson se jo të gjitha të dhënat kanë të njëjtën rëndësi – disa, si ato shëndetësore, janë më të ndjeshme, ndërsa të tjera, si blerjet, mund të monetizohen më lehtë.
Mundësi për markat
Privatësia po shndërrohet në një avantazh konkurrues. Disa kompani teknologjike tashmë po ofrojnë produkte që e vendosin privatësinë në qendër, si syze inteligjente pa kamera, për të shmangur shqetësimet e mbikëqyrjes.
Shembull është kompania Even Realities, e cila ofron syze inteligjente me çmim rreth 599 dollarë, duke e pozicionuar privatësinë si pjesë të vlerës së produktit.
Sipas CEO-së Will Wang, transparenca mbi mënyrën e mbledhjes së të dhënave është thelbësore dhe rrit besimin e klientëve.
E ardhmja e privatësisë
Ekspertët mendojnë se markat që përdorin qasje më të kujdesshme ndaj të dhënave – duke mbledhur më pak, por në mënyrë më transparente – do të fitojnë besimin e konsumatorëve.
Carol Aquino thekson se privatësia po bëhet një “proxy” për seriozitetin e markës dhe respektin ndaj klientit.
Fillimisht kjo tendencë po shihet te konsumatorët më të sofistikuar, por pritet që gradualisht privatësia të mos jetë më luks, por standard për të gjithë./fjala.al-A.D