Last Updated on 18/06/2026 by EL
Dhjetëra dronë ukrainas u lëshuan drejt Moskës të enjten, në një prej sulmeve më të mëdha ndaj kryeqytetit rus, duke goditur rafinerinë e naftës për herë të dytë këtë javë.
Kievi e quajti këtë një demonstrim të aftësive të tij në rritje për ta detyruar Rusinë të pranojë një marrëveshje paqeje. Një video e postuar në rrjetet sociale tregoi momentin e shpërthimit në rafinerinë që furnizon kryeqytetin me naftë, në distriktin e populluar të Kapotnias.
Kryetari i Bashkisë së Moskës, Sergei Sobianin, tha se ishin rrëzuar 555 dronë, 180 prej tyre në hapësirën ajrore të kryeqytetit, por se disa kishin arritur të godisnin objektivat e tyre.
Përveç rafinerisë, dëme u raportuan edhe në një qendër tregtare, në një pallat shumëkatësh në periferi të Moskës dhe në disa shtëpi private.
Nga ana e saj, Rusia lëshoi raketa mbi Kievin, pas një sulmi që dëmtoi manastirin e famshëm 1 000-vjeçar të qytetit dhe shkaktoi reagime të forta ndërkombëtare.
Shpërthime u dëgjuan në kryeqytetin ukrainas, ndërsa sirenat e alarmit ranë pothuajse në të gjithë territorin e vendit. Autoritetet në Kiev thanë se armiku kishte sulmuar me raketa balistike.
Ndërkohë, në rajonin e Sumit, një person u vra si pasojë e një sulmi me dron. /et