Olivia Wilde po rikthehet pas në kohë dhe po reflekton mbi martesën e saj me princin italian Tao Ruspoli, më shumë se një dekadë pas divorcit të tyre. Në një intervistë të re, aktorja tregoi se vendimi për t’u martuar në moshën 19-vjeçare ishte, në fakt, një formë rebelimi.
“Ndodhi në Burning Man. Vendimi për t’u martuar u mor atje dhe besoj se pati edhe një ceremoni në festival,” tha Wilde gjatë episodit më të fundit të podkastit “Call Her Daddy”.
Ajo shpjegoi se dokumentet zyrtare u plotësuan më pas në Los Anxhelos.
“Dokumentet i bëmë në Los Anxhelos me një person që mendoj se e gjetëm në internet. Ai erdhi, ne nënshkruam disa letra që ndoshta nuk kanë as vlefshmëri ligjore,” tregoi ajo me humor.
Megjithatë, nuk kaloi shumë kohë dhe Wilde nisi të vinte në dyshim vendimin që kishte marrë.
“Fillimisht mendova: ‘Në rregull!’ Dhe menjëherë pas kësaj: ‘Çfarë bëra vallë?’ Sepse edhe atëherë kisha prirjen të merrja vendime spontane. Kjo është një nga bukuritë e rinisë, por shpesh më fuste në situata të vështira,” kujtoi ajo.
Aktorja tregoi se para se të njihte Ruspoli-n, nuk kishte menduar seriozisht për martesën. Tao është djali i princit të ndjerë Alessandro Ruspoli.
“Më dukej si gjëja më e çmendur që mund të bëja dhe njëkohësisht tepër romantike. Ishte aq e papritur dhe e çmendur sa mendova: ‘Po, le ta bëj këtë gjë krejtësisht të paparashikueshme’. Sigurisht që prindërit e mi reaguan me: ‘O Zot!’”, tha ajo.
Wilde pranoi se një nga motivet kryesore ishte dëshira për t’u rebeluar.
“Meqë mund të bëja çfarë të doja, mënyra ime e rebelimit në atë periudhë ishte të bëja diçka shumë tradicionale,” tha ajo.
Megjithatë, sipas saj, martesa nuk ishte aspak tradicionale.
“Ishte shumë boheme dhe jam mirënjohëse për atë përvojë,” shtoi aktorja.
Olivia ishte vetëm 25 vjeçe kur ajo dhe Tao u divorcuan në vitin 2011. Fatmirësisht, ndarja e tyre ndodhi pa konflikte të mëdha.
“Nuk ishte një ndarje dramatike. Ishte thjesht momenti kur kuptuam se ishim rritur dhe ndodheshim në etapa krejt të ndryshme të jetës,” tha Wilde.
Sot, marrëdhënia mes tyre është e mirë.
“Është qesharake tani, sepse jemi miq. Më duket sikur ka ndodhur njëqind mijë vjet më parë. Është e pabesueshme,” përfundoi ajo./mxh