Last Updated on 08/07/2026 by Anisa
Qeveria spanjolle ka lëshuar një deklaratë në përgjigje të urdhrit të presidentit të SHBA-së, Donald Trump për të ndërprerë tregtinë me Spanjën, të cilën gazeta spanjolle El Pais raportoi se ishte përgatitur në rast se presidenti amerikan do ta sulmonte vendin në samitin e NATO-s.
Në deklaratën e zyrës së kryeministrit spanjoll, Pedro Sanchez thuhej se “Spanja i pret këto deklarata me qetësi dhe normalisht”, duke shtuar se ata nuk duan që të ndryshojnë marrëdhëniet e mira që kanë dy vendet në fushën sociale, kulturore dhe ekonomike.
“Lidhjet ekonomike krijohen nga kompani private, jo nga qeveritë. Marrëdhënia dypalëshe midis SHBA-së dhe Spanjës është e dobishme për të dy vendet, si në sferën tregtare ashtu edhe në atë të mbrojtjes.”
Presidenti Trump kërcënoi se do të ndërpresë marrëdhëniet tregtare me Spanjën dhe këmbënguli se dëshiron ende kontrollin mbi Groenlandën, ndërsa udhëheqësit e NATO-s u takuan në ditën e dytë të samitit të tyre në Ankara.
“Jam shumë i mërzitur me NATO-n,” u tha ai gazetarëve. “Nuk jam i kënaqur me NATO-n për shkak të asaj që bënë me Groenlandën, dhe nuk jam i kënaqur me NATO-n për faktin se nuk donin të na ndihmonin me shtetin sponsorizues numër një të terrorizmit në botë, që është Irani.”
Trump veçoi Spanjën për kritika të ashpra, duke e quajtur atë një “partner të tmerrshëm në NATO”.
“Spanja është një kauzë e humbur. Nuk duam të bëjmë më asnjë lloj tregtie me Spanjën,” tha ai, duke i kërkuar Sekretarit të tij të Thesarit, Scott Bessent, që “t’i ndërpresë marrëdhëniet”.
Ai shtoi se Groenlanda është “shumë e rëndësishme për Shtetet e Bashkuara, por nuk është e rëndësishme për Danimarkën”.
“Na duhet për mbrojtjen e botës, jo vetëm të Shteteve të Bashkuara… Ajo nuk i ndihmon Danimarkës, por na ndihmon ne./ad