Kur Princesha Diana zgjodhi unazën e saj të fejesës në vitin 1981, ajo nuk zgjodhi vetëm një bizhuteri të bukur, por edhe një simbol që do të sfidonte një nga traditat më të vjetra të familjes mbretërore britanike.
Ndryshe nga shumë unaza mbretërore që krijoheshin posaçërisht dhe ishin unike, Diana, atëherë Lady Diana Spencer, zgjodhi vetë modelin e saj nga katalogu i shtëpisë së bizhuterive Garrard, një nga furnizuesit historikë të monarkisë britanike.
Unaza përmbante një safir oval 12-karatësh nga Ceiloni, i rrethuar nga 14 diamante të vegjël, dhe në atë kohë kishte një vlerë prej më shumë se 37 mijë dollarësh. Por zgjedhja e saj shkaktoi diskutime, pasi modeli nuk ishte një krijim ekskluziv vetëm për familjen mbretërore. Në teori, i njëjti dizajn mund të blihej edhe nga persona të tjerë që kishin mundësinë financiare.
Frymëzimi i kësaj unaze lidhej me historinë e vetë monarkisë. Dizajni i saj ishte bazuar te një karficë safiri që Mbretëresha Victoria kishte marrë si dhuratë nga Princi Albert në vitin 1840 dhe që e kishte vendosur në fustanin e saj të dasmës si simbolin tradicional të “diçkaje blu”. Bizhuteria më pas kaloi ndër breza dhe u mbajt edhe nga Mbretëresha Elizabeth II.
Kur Princi Charles i paraqiti Dianës disa modele, ajo zgjodhi pikërisht këtë unazë, ndër të tjera edhe sepse ngjyra e safirit lidhej me sytë e saj blu. Vendimi i saj e bëri atë një nga bizhuteritë më të njohura në botë dhe një simbol të stilit të saj personal.
Por pas shkëlqimit të unazës fshihej edhe një histori më komplekse. Sipas zbulimeve të publikuara në libra të rinj mbi familjen mbretërore, Diana dhe Charles thuhet se kishin pasiguri për martesën e tyre që në fillim. Të dy nuk e njihnin mirë njëri-tjetrin përpara fejesës, ndërsa sipas autorëve, Diana kishte pasur dyshime serioze për të ardhmen e kësaj marrëdhënieje.
Këto detaje kanë sjellë një tjetër këndvështrim mbi një nga martesat më të famshme të shekullit XX, duke treguar se pas imazhit perfekt mbretëror kishte pasur shumë dilema dhe emocione të ndërlikuara.
Sot, unaza vazhdon të jetë një nga objektet më të famshme të historisë moderne mbretërore. Pas vdekjes së Dianës, ajo iu kalua djalit të saj, Princit William, i cili ia dhuroi bashkëshortes së tij, Kate Middleton, duke e kthyer sërish në qendër të vëmendjes globale./ad