Me rritjen e temperaturave, rriten edhe rreziqet që lidhen me sigurinë ushqimore. Në një intervistë për Dita Jonë në A2 CNN, eksperti i sigurisë ushqimore, Granit Sokolaj, ka dhënë këshilla për konsumatorët, duke apeluar për më shumë kujdes gjatë përzgjedhjes dhe ruajtjes së ushqimeve. Sipas tij një kujdes i veçantë duhet treguar për qumështin dhe nënproduktet e tij.
“Kujdesi duhet të jetë së pari nga blerja e qumështit dhe nënprodukteve të tij, nga vendi ku e blen, nëse janë të kontrolluara apo jo. Patjetër që produktet që shiten në rrugë janë absolutisht të ndaluara. Edhe të tregtohen, por edhe të blihen e të konsumohen nga ne për produktet me origjinë shtazore. Kështu që ato përbëjnë gjithmonë risk, sidomos në verë patjetër, por edhe në të gjitha stinët”, tha ai në Dita Jonë në A2 CNN.
Eksperti këshilloi që produktet ushqimore me origjinë shtazore të ruhen në temperatura të ulëta, rreth 4-7 gradë Celsius, ndërsa produktet që gatuhen duhet të konsumohen sa më shpejt dhe të mos ruhen për periudha të gjata edhe në frigorifer.
“Çdo produkt që gatuhet duhet të konsumohet menjëherë. Nuk është e rekomandueshme që produktet të rrinë gjatë as në frigorifer. Të ftohet, ngrohet, ndikon për sa kohë nuk shkon edhe në ngrirje ndikon sigurisht në ngarkesat bakteriale, mikrobike të produkteve, ndryshimi i temperaturave i shpeshtë. Gjithsesi të gjithë ne pa përjashtim ë fusim produktet që mbesin nga një vakt në frigorifer dhe e mira është që të konsumohen brenda asaj dite ose maksimumi vaktin tjetër të ditës tjetër, por gjithmonë duke u ruajtur në kushtet e duhura frigoriferike, në temperaturën e duhur të frigoriferit”.
Sokolaj theksoi se gjatë sezonit veror, veçanërisht në zonat turistike, shtohet rreziku për probleme shëndetësore për shkak të temperaturave, mbingarkesës së ambienteve të shërbimit dhe trajtimit jo të duhur të produkteve ushqimore.
Ai paralajmëroi veçanërisht për produktet krudo, sidomos frutat e detit dhe mishrat e papërpunuar mirë, të cilat mund të shkaktojnë infeksione, nëse nuk ruhen dhe përpunohen në kushte të përshtatshme.
“Produktet krudo përbëjnë një risk në vetvete qoftë produktet e detit tashmë që konsumohen masivisht, por dhe produkte mishi normale të cilat për arsye të ndryshme, për mënyra të ndryshme gatimi shërbejnë të papërpunuara mirë, gjysmë krudo apo gjysmë të pjekura e tjera. Këto përbëhen risk veçanërisht nëse nuk trajtohen në mënyrën e duhur nga stafet që gatuajnë, për të cilat veçanërisht për produktet krudo duhet të jenë njerëz të specializuar, të trajnuar, kanë kushte specifike ruajtje dhe përpunimi apo edhe gatimi”, tha ai.
Sokolaj tha se konsumatorët duhet të tregohen të kujdesshëm edhe me restorantet, duke zgjedhur ambiente që ofrojnë kushte të mira higjieno-sanitare dhe duke kërkuar informacion për origjinën e produkteve që konsumojnë.
Sipas tij, jo gjithmonë produktet që ofrohen si “të freskëta” janë të tilla, veçanërisht në rastin e peshkut dhe produkteve të detit, ndaj qytetarët kanë të drejtë të informohen për origjinën dhe mënyrën e ruajtjes së tyre./ad