Në ditët e fundit të merkatos së verës, emri i Lautaro Martinez është rikthyer në qendër të vëmendjes për një transferim të mundshëm nga Interi te Barcelona. Nga Spanja vijnë raportime se klubi katalanas ka nisur të punojë për sulmuesin argjentinas dhe se mes palëve ka një marrëveshje paraprake për kushtet e një transferimi.
Sipas “El Chiringuito”, javën e kaluar është zhvilluar një takim mes drejtorit sportiv të Barcelonës, Deco, dhe agjentit të Lautaro Martinez, Alejandro Kamano. Bisedimet, sipas versionit të publikuar në Spanjë, kanë sjellë një akord në parim mes përfaqësuesit të futbollistit dhe drejtuesve të klubit katalanas.
Interesi për Lautaron lidhet edhe me vështirësitë që Barcelona ka hasur në përpjekjen për të afruar Julian Alvarez. Në këtë situatë, drejtuesit katalanas po shqyrtojnë alternativën Lautaro Martinez, i cili prej vitesh është një nga lojtarët kryesorë të Interit dhe mban edhe shiritin e kapitenit të skuadrës.
Barcelona është e gatshme të bëjë një investim të rëndësishëm financiar për ta realizuar transferimin. Shifra që përmendet është rreth 100 milionë euro, një vlerë që do të përfaqësonte një nga operacionet më të rëndësishme të klubit katalanas në këtë merkato.
Megjithatë, nga ana e Interit situata është krejt tjetër. Deri tani, klubi zikaltër nuk ka marrë asnjë ofertë zyrtare dhe nuk ka ndryshuar qëndrimin e tij për të ardhmen e sulmuesit argjentinas. Interi e konsideron kapitenin pjesë të rëndësishme të projektit sportiv dhe nuk ka dhënë sinjale për një transferim të tij./mxh