Një automjet i mbushur me municione ka shpërthyer të martën në qytetin Binnish, në provincën Idlib të Sirisë veriperëndimore, duke shkaktuar të paktën pesë viktima dhe pesë të plagosur, sipas autoriteteve siriane dhe mediave lokale.
Shpërthimi ndodhi në një zonë të banuar të Binnishit dhe shkaktoi dëme të konsiderueshme, ndërsa dy automjete që ndodheshin pranë vendit të ngjarjes u shkatërruan. Ekipet e emergjencës dhe të shpëtimit u dërguan menjëherë në vendngjarje, ndërsa të plagosurit u transportuan në spitalet e afërta për trajtim.
Fillimisht, Drejtoria e Menaxhimit të Emergjencave dhe Fatkeqësive në Idlib raportoi për dy persona të vrarë dhe të paktën tetë të plagosur. Më vonë, televizioni sirian Al-Ikhbariya raportoi se numri i viktimave kishte shkuar në pesë, ndërsa pesë persona të tjerë kishin mbetur të plagosur.
Shkaku i shpërthimit nuk është bërë ende i ditur zyrtarisht. Agjencia shtetërore siriane e lajmeve SANA, duke cituar autoritetet dhe një burim sigurie, konfirmoi se automjeti ishte i ngarkuar me municione. Ndërkohë, Observatori Sirian për të Drejtat e Njeriut raportoi se pas shpërthimit të parë kishte vazhduar të shpërthente edhe municion tjetër, duke rritur rrezikun për banorët dhe ekipet e emergjencës për shkak të copëzave metalike dhe municioneve që mund të fluturonin në zonën përreth.
Shpërthimi shkaktoi panik te banorët e Binnishit, ndërsa autoritetet vendosën ekipet e emergjencës në gatishmëri për të parandaluar shpërthime të tjera dhe për të siguruar zonën.
Agjencia AFP, duke cituar një zyrtar qeveritar të paidentifikuar, raportoi se automjeti i përkiste një tregtari lokal armësh në Binnish. Megjithatë, ky informacion nuk është konfirmuar në mënyrë të pavarur dhe autoritetet nuk kanë dhënë ende një shpjegim zyrtar për rrethanat që çuan në shpërthim.
Provinca Idlib ka qenë për vite me radhë një nga qendrat kryesore të grupeve të armatosura rebele në Siri, përpara rrëzimit të ish-presidentit Bashar al-Assad në dhjetor 2024. Në rajon janë raportuar edhe më parë shpërthime në depo armësh, objekte ushtarake dhe vende ku ruheshin municione, ndërsa shkaqet e incidenteve jo gjithmonë janë bërë publike nga autoritetet.
Në nëntor, një shpërthim në një magazinë me raketa dhe municione në qytetin Kafr Takharim shkaktoi vdekjen e pesë personave dhe plagosjen e nëntë të tjerëve, sipas ushtrisë siriane. Ndërsa tre muaj më herët, një shpërthim në një depo me mbetje luftarake në periferi të qytetit Idlib vrau katër persona.
Incidenti i fundit në Binnish rikthen shqetësimet për sigurinë e popullsisë në Idlib, ku prania e municioneve dhe materialeve të mbetura nga vitet e konfliktit vazhdon të përbëjë rrezik serioz për civilët./mxh