Dritat fiken, telefonat lihen në komodinë dhe “natën e mirë” shpesh është fjala e fundit që një çift i thotë njëri-tjetrit para gjumit. Por kur në dhomë nis gërhitja e vazhdueshme, nata mund të mos jetë aspak e qetë, sidomos për personin që përpiqet të flejë pranë partnerit.
Ndërprerjet e shpeshta të gjumit mund të sjellin lodhje, irritim, vështirësi në përqendrim dhe probleme me kujtesën gjatë ditës. Ekspertët theksojnë se, kur gërhitja shqetëson vazhdimisht gjumin e personit tjetër, pasojat mund të jenë më të rëndësishme nga sa mendohet.
Pse gërhitja na prish gjumin?
Gërhitja ndodh kur indet e rrugëve të sipërme të frymëmarrjes relaksohen gjatë gjumit dhe pengojnë pjesërisht kalimin e ajrit. Sipas British Snoring & Sleep Apnea Association, rreth 40% e të rriturve në Mbretërinë e Bashkuar gërhasin, ndërsa fenomeni është më i zakonshëm te burrat.
Kur një person zgjohet vazhdimisht nga zhurma e gërhitjes, mund të kalojë më pak kohë në fazat më të thella të gjumit. Këto faza janë veçanërisht të rëndësishme për rikuperimin fizik dhe mendor.
Gjumi luan gjithashtu një rol të rëndësishëm në përpunimin dhe ruajtjen e informacionit të marrë gjatë ditës. Prandaj, ndërprerjet e përsëritura mund të ndikojnë në përqendrim, kujtesë dhe nivelin e energjisë të nesërmen.
“Ndihem sikur kam pirë një natë më parë”
Për disa njerëz, pasojat e një nate të tillë janë aq të forta sa lodhjen e krahasojnë me ndjesinë e një hangover-i.
Sipas Dr Clare Simon, mungesa e gjumit për shkak të gërhitjes mund të sjellë më shumë irritim dhe debate. Në një çift, kjo mund të ndikojë edhe në mënyrën se si partnerët komunikojnë me njëri-tjetrin.
A është në rregull të flini në dhoma të ndryshme?
Në disa raste, situata bëhet aq e vështirë sa partneri që shqetësohet nga gërhitja zgjedh të flejë në një dhomë tjetër. Edhe pse kjo mund të duket si një zgjidhje jo romantike, për disa çifte mund të jetë mënyra më praktike për të siguruar një gjumë të plotë.
Gazetarja 52-vjeçare Anna-Louise Dearden ka treguar se zgjedhja për të fjetur në një dhomë tjetër i ka dhënë mundësinë të vendosë gjumin në plan të parë, sidomos gjatë netëve kur gërhitja është më e fortë.
Ajo ka vënë re se pas një nate të keqe gjumi ndihet më e irrituar dhe ka më shumë dëshirë për të ngrënë. Në përvojën e saj, tapa për veshët mund të ndihmojnë gjithashtu në reduktimin e zhurmës gjatë natës.
Kur gërhitja nuk duhet neglizhuar
Ekspertët theksojnë se gërhitja nuk duhet trajtuar gjithmonë si një bezdi e zakonshme. Në disa raste, ajo mund të jetë shenjë e apnesë së gjumit, një çrregullim ku frymëmarrja ndalon dhe rifillon në mënyrë të përsëritur gjatë gjumit.
Shenjat që mund të kërkojnë vëmendje përfshijnë pauza të dukshme në frymëmarrje, zgjime të shpeshta gjatë natës, ndjesinë e mbytjes ose marrjen e frymës papritur dhe dhimbjet e kokës në mëngjes.
Përveç ndikimit në cilësinë e gjumit, mund të ndikojë edhe në humor, përqendrim dhe marrëdhënien mes partnerëve. Prandaj, nëse problemi përsëritet dhe po ndikon në jetën e përditshme, ia vlen të kërkohet shkaku dhe një zgjidhje e përshtatshme./mxh