Last Updated on 22/09/2026 by EL
Rusia ka nisur një proces të heshtur rikonstruksioni të strehimeve kundër bombardimeve në Moskë dhe Shën Petersburg, ndërsa sulmet me dronë ukrainas po godasin gjithnjë e më shpesh objektiva në territorin rus.
Të dhënat e prokurimeve publike, të raportuara nga mediat e pavarura ruse, tregojnë se në fillim të shtatorit janë akorduar 39 milionë rubla, rreth 400 mijë euro, për rikonstruksionin e nëntë strehimeve në tre zona të Moskës jugperëndimore. Zona përfshin dhjetëra institute kërkimore dhe kompani të industrisë së mbrojtjes.
Punimet, që pritet të përfundojnë deri më 30 nëntor, përfshijnë hyrjet, ndarjet e brendshme, dyert dhe sistemet e ujit, energjisë elektrike, kanalizimeve, ventilimit dhe komunikimit.
Fonde të tjera janë parashikuar për strehimet në distriktin Novogirejevo të Moskës, ndërsa një rikonstruksion i madh është planifikuar në territorin e njohur si Moska e Re, për një strehim të ndërtuar në vitin 1971, i cili disponon edhe një central të vetin me naftë.
Në fillim të verës u publikuan tenderë me vlerë rreth 200 milionë rubla, rreth 2 milionë euro, për rikonstruksionin e strehimeve në 17 distrikte të Moskës, kryesisht në pjesën lindore të qytetit.
Edhe në Shën Petersburg po ndërmerren masa të ngjashme. Operatori i metrosë publikoi në fillim të shtatorit një kërkesë për kontraktorë për ndërtimin dhe përshtatjen e strehimeve kundër bombardimeve në nëntë stacione, katër segmente dhe rreth 35 kilometra linjë metroje. Projekti parashikon përshtatjen e stacioneve funksionale dhe atyre ende të papërfunduara me kërkesat e mbrojtjes civile, përfshirë sisteme filtrimi të ajrit dhe furnizimi me ajër nën presion.
Masa të tilla vijnë në një moment kur Rusia po përballet me intensifikimin e sulmeve ukrainase ndaj objektivave energjetike dhe industriale. Të dielën në mbrëmje, dronë ukrainas goditën rafinerinë e Moskës në Kapotnja, duke shkaktuar zjarre në njësitë kryesore të përpunimit të naftës dhe ndërprerjen e operacioneve, sipas raportimeve të publikuara.
Në gusht, zhvilluesi ukrainas i raketave FirePoint dhe ish-ministri i Mbrojtjes, Mykhailo Fedorov, deklaruan se forcat ukrainase mund të jenë në gjendje të godasin Moskën me raketa të reja balistike deri në fund të vitit.
Presidenti ukrainas Volodymyr Zelenskyy ka deklaruar se Moska nuk duhet të ndërtojë rrjete të reja të mbrojtjes ajrore në kurriz të rajoneve të tjera, por t’i japë fund luftës dhe të zgjedhë paqen.
Infrastruktura e mbrojtjes civile në Moskë dhe Shën Petersburg daton kryesisht nga shekulli XX. Ajo përfshin bunkerë komandimi për komunikimet qeveritare dhe ushtarake, si dhe strehime masive për civilët, mes tyre edhe rrjetin e metrosë.
Inventarizimet e fundit në Shën Petersburg kanë evidentuar një numër të konsiderueshëm strehimesh që kanë nevojë për riparime, ndërsa një pjesë e hapësirave të bodrumeve të ndërtesave të banimit ka kaluar në pronësi private.
Në Ukrainë, ndërkohë, metrotë e Kievit, Kharkivit dhe Dnipros janë përdorur si strehime kundër bombardimeve gjatë gjithë kohës që prej nisjes së pushtimit të plotë rus në vitin 2022. Gjatë sulmeve ajrore, në to janë strehuar njëkohësisht dhjetëra mijëra njerëz.
Në rajonet pranë vijës së frontit, ku nuk ka metro, janë ndërtuar shkolla nëntokësore të posaçme, duke u mundësuar fëmijëve të vijojnë mësimin në ambiente të mbrojtura. Për shkak të kërcënimit të vazhdueshëm nga sulmet ajrore ruse, sistemi arsimor ukrainas ka përdorur gjithashtu gjerësisht mësimin në distancë.