Ministri izraelit i Sigurisë Kombëtare, Itamar Ben-Gvir, ka kërcënuar me vdekje Hassan Salamehun, një të dënuar të Hamasit që po vuan disa dënime të përjetshme për rolin e tij në sulmet me bomba në Jerusalem në vitin 1996.
Në një video të publikuar të dielën në mbrëmje, Ben-Gvir shihet duke iu drejtuar Salamehut gjatë një vizite në burg, të cilën ministri tha se e kishte zhvilluar rreth dy javë më parë. “Dua të të vras. Dua të të dënoj me vdekje”, i thotë ai të burgosurit.
Salameh u arrestua në vitin 1996 dhe u shpall fajtor për organizimin e disa sulmeve terroriste. Dy sulmet ndaj autobusëve të linjës 18 në Jerusalem, më 25 shkurt dhe 3 mars të atij viti, shkaktuan 45 viktima. Në një sulm tjetër, në kryqëzimin e Ashkelonit më 25 shkurt, u vra edhe ushtarja e IDF-së, Hofit Aish. Për këto vepra, Salameh u dënua me 46 burgime të përjetshme të njëpasnjëshme, si dhe me 30 vite shtesë burgim.
סגירת מעגל ענקית עבורי! כנער עמדתי ברחובות והפגנתי אחרי פיגועי התופת הנוראיים בקו 18 בירושלים. עשרות חפים מפשע נרצחו, ומשפחות שלמות נחרבו. לפני כשבועיים הגעתי לכלא ופגשתי פנים אל פנים את הארכי מחבל חסאן סאלמה – מבכירי חמאס, חברו ושותפו של יחיא סינוואר ימ״ש, שנשלח בידי הצורר מוחמד דף ימ״ש ליהודה ושומרון לארגן את אותם הפיגועים באוטובוסים. אמרתי לו שהנער שהפגין אז ברחובות הוא היום השר לביטחון לאומי והסתכלתי לשטן בעיניים. הוא רעד והיה מבוהל – ויש לו סיבה טובה. כשר לביטחון לאומי הובלתי מדיניות שהפכה את חייו לגיהנום. ובעזרת ה׳, כשר הביטחון, אפעל לכך שמחבלים רוצחים כמוהו יוצאו להורג, ואקדם את מדיניות ההגירה מעזה ומיהודה ושומרון.
— איתמר בן גביר (@itamarbengvir) September 27, 2026
Gjatë përballjes në burg, Ben-Gvir i tha Salamehut se pas vdekjes do të shkonte në ferr. Ministri e akuzoi atë për vrasjen e dhjetëra njerëzve, përfshirë fëmijë, gra, burra dhe ushtarë.
Ben-Gvir tha gjithashtu se kishte protestuar që në fëmijëri për një trajtim më të ashpër të personave të dënuar për sulme të tilla dhe se tani, sipas tij, po “mbyllte rrethin”.
Që prej sulmeve të 7 tetorit 2023, Ben-Gvir ka mbështetur politika më të ashpra ndaj të burgosurve palestinezë të klasifikuar si të burgosur sigurie. Ndër masat e ndërmarra është ndalimi i blerjes së ushqimeve në kantinat e burgjeve dhe i përgatitjes së ushqimit nga vetë të burgosurit.
Çështja e kushteve të ushqimit është përplasur edhe me vendimet e Gjykatës së Lartë të Izraelit. Në shtator 2025, gjykata vendosi se Shërbimi i Burgjeve të Izraelit nuk po garantonte ushqim në nivelin e kërkuar nga ligji dhe urdhëroi marrjen e masave për garantimin e kushteve bazë. Shërbimi i Burgjeve deklaroi se të burgosurit marrin ushqim në përputhje me ligjin dhe vendimet gjyqësore e se vepron nën udhëzime detyruese dhe mbikëqyrjen e autoriteteve përkatëse.
Në mars 2026, Knesseti miratoi me 62 vota pro dhe 48 kundër një ligj që parashikon dënimin me vdekje për persona të caktuar të dënuar për vrasje të qëllimshme në sulme terroriste. Legjislacioni parashikon mundësinë e dënimit kapital për raste të caktuara, ndërsa gjykatat civile mund të shqiptojnë dënim me vdekje ose burgim të përjetshëm.
Megjithatë, ligji nuk mund të zbatohet në mënyrë retroaktive. Për këtë arsye, ai nuk mund të përdoret ndaj Salamehut për veprat e kryera në vitin 1996. Izraeli nuk ka kryer një ekzekutim që nga viti 1962, kur u ekzekutua Adolf Eichmann, një prej figurave të regjimit nazist.
Ben-Gvir deklaroi se, nëse do të merrte postin e ministrit të Mbrojtjes, do të punonte për mundësinë që terroristët e dënuar për vrasje të përballeshin me dënimin me vdekje. Ai përsëriti gjithashtu mbështetjen e tij për një politikë të emigrimit të palestinezëve nga Gaza dhe Bregu Perëndimor.
Hamas e dënoi deklaratën e ministrit izraelit, duke thënë se kërcënimet e tij nuk do t’i frikësonin të burgosurit palestinezë. Organizata e akuzoi Ben-Gvirin për ndërmarrjen e masave të tjera ndaj të burgosurve.
Në përgjigje, Ben-Gvir tha se reagimi i Hamasit tregonte, sipas tij, se politika e tij po jepte rezultat. Ai deklaroi se do të vazhdonte përpjekjet për ashpërsimin e trajtimit të të burgosurve të sigurisë dhe për zbatimin e ligjit të ri për dënimin me vdekje./mxh