Last Updated on 02/10/2026 by EL
Dy nisma të qeverisë spanjolle për përballimin e krizës së strehimit janë rrëzuar nga Kongresi, duke i shkaktuar një humbje të drejtpërdrejtë qeverisë së Pedro Sánchez dhe duke nxjerrë në pah vështirësitë e saj për të siguruar shumicën parlamentare.
Votimi erdhi pas negociatave të zhvilluara deri në minutat e fundit me partitë që mund të siguronin mbështetjen për masat. Dekretligji i parë u rrëzua me 178 vota kundër dhe 172 pro, ndërsa pak më vonë edhe nisma e dytë nuk mori mbështetjen e Kongresit.
Para votimit, Sánchez iu drejtua deputetëve me një apel të fortë për të mbështetur masat. “Bëni gjënë e duhur, përndryshe historia do t’ju gjykojë më shpejt nga sa mendoni dhe më ashpër nga sa mund ta imagjinoni”, deklaroi kryeministri.
Ministrja e Strehimit, Isabel Rodríguez, kishte bërë përpjekje gjatë gjithë paradites për të siguruar votat e nevojshme, duke iu drejtuar veçanërisht Junts per Catalunya për të votuar pro ose të paktën për të abstenuar. Partia katalanase kishte njoftuar një ditë më parë se do të votonte kundër të dyja nismave dhe kishte kërkuar që qeveria t’i tërhiqte ato.
PSOE nuk pranoi të tërhiqej. Rodríguez argumentoi se një prej dekretligjeve kishte përfshirë pjesën më të madhe të propozimeve të Junts, ndërsa premtoi se gjatë shqyrtimit të mëtejshëm si projektligje mund të bëheshin sqarime dhe korrigjime teknike.
Në qendër të debatit ishte kriza e strehimit, e cila është bërë një prej çështjeve më të ndjeshme sociale në Spanjë. Qeveria e kishte lidhur paketën edhe me rastin e Maricarmen, dëbimi i së cilës nga banesa kishte nxitur reagime dhe protesta.
Në Kongres, mbështetja për qeverinë mbeti e pamjaftueshme. PP dhe Vox kundërshtuan masat, ndërsa Junts konfirmoi votën kundër. PNV mbështeti njërin prej dekretligjeve, por me rezerva të forta, ndërsa Coalición Canaria votoi pro të parit. Podemos mbështeti të dyja nismat, ndërsa EH Bildu shprehu gjithashtu pakënaqësi për mënyrën se si po trajtohej kriza e strehimit.
PSOE dhe Sumar nuk kanë shumicë absolute në Kongres, duke e bërë mbështetjen e partive të tjera të domosdoshme për miratimin e nismave të qeverisë.
Rrëzimi i masave ka rikthyer edhe diskutimin për mundësinë e zgjedhjeve të parakohshme. Nga La Moncloa është bërë e ditur se nuk është marrë asnjë vendim, ndërsa brenda PSOE ka pasur thirrje për kujdes në vlerësimin e pasojave të një vendimi të tillë.
Ndërkohë, jashtë Kongresit, protestues të mobilizuar nga Unioni i Qiramarrësve kërkuan masa konkrete për krizën e strehimit. Protesta vijoi gjatë seancës, ndërsa policia kishte vendosur një prani të shtuar sigurie rreth Parlamentit.