Last Updated on 22/10/2026 by Monika
Airbnb ka ndryshuar rregullat për largimin e vizitorëve nga banesat me qira afatshkurtër, duke ndaluar detyrat që kërkojnë kohë ose përpjekje të konsiderueshme, si heqja e çarçafëve nga krevati apo nxjerrja e mbeturinave.
Një nga ankesat më të shpeshta të personave që zgjedhin të qëndrojnë në banesat e rezervuara përmes Airbnb janë detyrat që u kërkohen para largimit. Por, me përditësimin e politikave të platformës, pritësit nuk mund t’i përfshijnë më këto kërkesa në rregullat e banesës, nëse ato kërkojnë punë që zakonisht kryhet nga pastruesit.
Sipas politikës së re, vizitorëve nuk mund t’u kërkohet të kryejnë veprime që kërkojnë “përpjekje ose kohë të konsiderueshme, apo që zakonisht do të kryheshin nga një pastrues”.
Për shembull, pritësit nuk mund t’u kërkojnë vizitorëve të lajnë enët dhe t’i vendosin përsëri në dollapë. Megjithatë, ata mund t’u kërkojnë t’i lënë enët e përdorura në lavaman.
Në një deklaratë për Euronews Travel, Airbnb shpjegoi se rregullat e banesës duhet t’i ndihmojnë vizitorët të kuptojnë pritshmëritë e pritësve, por pranoi se deri më tani ato kanë qenë shpesh të paqarta, të lodhshme dhe të vështira për t’u menaxhuar.
“Për këtë arsye, i kemi ridizenjuar rregullat për t’i bërë më të lehta për t’u gjetur dhe më të qarta, duke prezantuar njëkohësisht një politikë të re që garanton kërkesa të arsyeshme dhe shmang surprizat e pakëndshme”, thuhet në deklaratë.
Rregullat e reja të Airbnb
Me përditësimin e ri, rregullat e banesës do të shfaqen drejtpërdrejt në faqen e pronës, te seksioni i udhëtimeve dhe në njoftimet për rezervimet.
Pritësit do të mund të përcaktojnë shtatë kategori standarde rregullash, që lidhen me oraret e hyrjes dhe largimit, numrin e vizitorëve të miratuar, ndalimin e duhanit, lejimin e kafshëve shtëpiake, oraret e qetësisë, si dhe filmimet dhe fotografimet për qëllime tregtare.
Ata mund të shtojnë edhe kërkesa të tjera të arsyeshme, të cilat mund t’i përditësojnë në çdo kohë. Megjithatë, Airbnb do të sinjalizojë kërkesat që nuk përputhen me politikën e re dhe do t’u kërkojë pritësve t’i heqin ose të paraqesin një ankesë kundër këtij vlerësimi.
Një tjetër pikë e rëndësishme lidhet me tarifën e pastrimit. Sipas rregullave të reja, kjo tarifë duhet të mbulojë vetëm pastrimin e zakonshëm të banesës ndërmjet qëndrimeve të vizitorëve.
Pritësit nuk mund t’u vendosin tarifa shtesë vizitorëve për moskryerjen e detyrave të përfshira në listën e veprimeve që kërkohen gjatë largimit.