Last Updated on 05/11/2026 by Monika
Presidenti ukrainas Volodymyr Zelenskyy i kërkoi të enjten Spanjës dhe vendeve të Amerikës Latine të ndihmojnë në “rindërtimin dhe restaurimin e sistemit energjetik të Ukrainës”, i cili ka pësuar dëme të mëdha nga sulmet ruse.
“Ne kemi nevojë për sa më shumë bashkëpunim ndërkombëtar që të jetë e mundur në mënyrë që të vazhdojmë rindërtimin dhe restaurimin e sistemit tonë energjetik”, tha udhëheqësi ukrainas gjatë një takimi në kuadër të Samitit të 30-të Ibero-Amerikan, i cili përfundoi sot në kryeqytetin spanjoll.
“Na duhen më shumë materiale, transformatorë, kabllo elektrike, pajisje moderne elektronike, si dhe lloje të ndryshme gjeneratorësh, si të naftës ashtu edhe të gazit”, tha Volodymyr Zelensky, në prani të kryeministrit spanjoll Pedro Sanchez, presidentëve të Guatemalës dhe Hondurasit, Bernardo Arevalo dhe Nasri Asfora, si dhe Sekretarit të Përgjithshëm të Kombeve të Bashkuara, Antonio Guterres, dhe Presidentit të Këshillit Evropian, Antonio Costa.
“Ne e dimë që kompanitë në Spanjë dhe Amerikën Latine mund të na ndihmojnë në këtë përpjekje”, shtoi ai, duke iu referuar “transformatorëve nga Brazili, Meksika, Argjentina dhe Kolumbia”, “kabllot elektrike nga Kili”, si dhe “pajisjeve elektronike, kabllove dhe gjeneratorëve të prodhuar në Spanjë”.
“Kjo është jashtëzakonisht e rëndësishme”, theksoi ai, duke shtuar: “Ne kemi nevojë për pajisje të pajtueshme me rrjetin elektrik të vendit tonë dhe na duhen urgjentisht. Prandaj, ju kërkojmë të na ofroni mbështetje të menjëhershme, duke lehtësuar komunikimin tonë me kompanitë dhe qasje në aftësitë tuaja të prodhimit, në mënyrë që furnizimet të arrijnë në Ukrainë sa më shpejt të jetë e mundur.”
Vizita e presidentit ukrainas në Spanjë, pas udhëtimit të tij në Berlin të martën, erdhi mes përpjekjeve të përtërira diplomatike për të ringjallur shpresat për paqe, si dhe komunikimit të kohëve të fundit midis Donald Trump dhe Vladimir Putin.
Këto zhvillime kanë ngritur shqetësime në Kiev rreth mundësisë së tërheqjes së mbështetjes nga SHBA-të, ndërsa Ukraina përgatitet për një dimër të vështirë mes bombardimeve ruse./mxh