Last Updated on 18/11/2026 by Anisa
“Mirë se vini në shërbimin sekret të Madhërisë së Tij, zoti Bond”. Nga shefi i Amazon, Jeff Bezos, te Brad Pitt dhe aktorët që kanë bashkëpunuar me Robert Pattinson, ja si është pritur zgjedhja e aktorit britanik si James Bond-i i shtatë.
Pas muajsh spekulimesh, Robert Pattinson është konfirmuar zyrtarisht si aktori që do të interpretojë agjentin e famshëm 007. Ai e cilësoi këtë rol si “nderin e jetës” dhe “një ëndërr të bërë realitet”. Reagimet kanë qenë kryesisht pozitive, ndërsa tashmë është zbuluar se në procesin e përzgjedhjes ka pasur një rol edhe drejtuesi i Amazon, Jeff Bezos.
Duke folur në një aktivitet në Kaliforni, Bezos zbuloi se ishte përfshirë personalisht në përzgjedhje. Ai pranoi se fillimisht kishte pasur rezerva për Pattinson, pasi aktori ishte tashmë shumë i famshëm, ndërsa producentët po mendonin për një emër më pak të njohur. Megjithatë, pas provës në ekran, bindja ishte e menjëhershme. “Është kaq e qartë. Ai është James Bond”, u shpreh Bezos.
Sipas tij, pesë aktorët finalistë ishin jashtëzakonisht të talentuar, por Pattinson kishte diçka të veçantë. Debutimi i tij do të jetë filmi i parë i sagës pas blerjes së studios MGM nga Amazon.
Lajmi u prit me entuziazëm edhe nga familja mbretërore britanike, e cila publikoi në Instagram mesazhin: “Mirë se vini në shërbimin sekret të Madhërisë së Tij, zoti Bond”. Ndërkohë, një zëdhënës i kryeministrit britanik Andy Burnham e cilësoi rolin si një mundësi të jashtëzakonshme për aktorin.
Nga ana tjetër e Atlantikut, edhe sekretari amerikan i Shëndetësisë, Robert F. Kennedy Jr., iu bashkua reagimeve, duke publikuar një imazh të krijuar me inteligjencë artificiale, ku shfaqej si James Bond, por në vend të armës mbante një karotë gjigante. Postimin e shoqëroi me mesazhin “Ushqim. Ushqim i vërtetë”. Publikimi u prit me ironi dhe kritika në rrjetet sociale.
Më serioz ishte komenti i regjisorit të filmit të ardhshëm të sagës, Denis Villeneuve, i cili në një intervistë për revistën GQ shpjegoi cilësitë që kërkonte te aktori i ri i 007. Sipas tij, Bond duhet të përcjellë rrezik, karizëm, inteligjencë, sensualitet dhe një humor të errët.
“Duhet të besoj se ky njeri është një vrasës, sepse më shumë se një spiun, Bond është një atentator”, tha Villeneuve, duke shtuar se kërkonte një aktor me forcë, prani imponuese dhe inteligjencë që dallohet në shikim.
Duket se Pattinson i ka përmbushur këto kritere. Regjisori ka punuar më parë me të në filmin e ardhshëm Dune: Part Three.
Edhe emra të njohur të Hollywood-it kanë shprehur mbështetjen e tyre. Rami Malek, i cili interpretoi personazhin negativ Safin në filmin e fundit të Daniel Craig, No Time to Die, tha se Pattinson do të jetë i jashtëzakonshëm në rolin e 007. Ai u shpreh se e njeh prej kohësh aktorin dhe se është krenar që talenti i tij po merr këtë vlerësim.
Ralph Fiennes, i njohur për rolin e M në tre filma të sagës, fillimisht pranoi se vazhdon të jetë i dashuruar me interpretimin e Daniel Craig, por shtoi se Pattinson është një aktor i shkëlqyer dhe se është i bindur që do ta realizojë mirë rolin.
Aktorja Elizabeth Debicki, bashkëprotagoniste e Pattinson në filmin Tenet, u shpreh se ishte shumë e emocionuar për të, duke e cilësuar si Bond-in e përsosur. Ajo vlerësoi karizmën, inteligjencën, humorin dhe zgjedhjet artistike të aktorit ndër vite.
Edhe Brad Pitt e mbështeti publikisht këtë zgjedhje. “Më pëlqen kjo ide. Më pëlqen ajo që ka bërë dhe zgjedhjet e tij. Mendoj se është njeriu i duhur për këtë rol”, deklaroi aktori, duke shtuar me humor se nuk do ta kishte problem të interpretonte një nga kundërshtarët e ardhshëm të Bond-it.
Ndërkohë, George Lazenby, aktori më i moshuar që ka interpretuar James Bond dhe i vetmi që e ka luajtur personazhin vetëm në një film, në vitin 1969, i uroi mirëseardhjen Pattinson-it në këtë klub ekskluziv. “Robert, mirë se erdhe në klubin më ekskluziv në botë”, tha ai në një video-mesazh, duke e këshilluar të shijojë përvojën.
Pattinson bëhet kështu aktori i shtatë që interpreton James Bond-in në ekranin e madh, pas Sean Connery, George Lazenby, Roger Moore, Timothy Dalton, Pierce Brosnan dhe Daniel Craig.
Për filmin e 26-të të sagës, që ende nuk ka një titull zyrtar, publiku do të duhet të presë. Xhirimet pritet të nisin vitin e ardhshëm, por fillimisht Pattinson duhet të përfundojë filmin The Batman Part II.
Filmi i ri i James Bond pritet të dalë jo më herët se gjysma e dytë e vitit 2028. Nëse ky afat konfirmohet, do të shënohet një nga periudhat më të gjata të pritjes mes dy filmave të sagës, shtatë vjet pas No Time to Die.
