Një tjetër zhvillim në marrëdhëniet mes banorëve të Big Brother VIP Kosova ka ardhur nga Jona Krasniqi. Gjatë një bisede me Vëllain e Madh, ajo ka zbuluar se reperi Fuego i ka shprehur interesin e tij romantik, duke lënë të kuptohet se kjo pëlqesë ka nisur që në ditët e para të qëndrimit të tyre në shtëpi.
Jona tregoi se në fillim Fuego kishte dhënë sinjale në mënyrë indirekte, por më pas raporti mes tyre ishte ftohur. Sipas saj, situata ndryshoi edhe për shkak të afrimit të reperit me Olechkën.
Ajo theksoi se nuk e shqetëson fakti që Fuego ka shprehur pëlqim për të, pasi e konsideron këtë të drejtë të tij, ndërsa aktualisht mes tyre ka një distancë të shoqëruar me respekt.
Ndërkohë, në një tjetër moment të transmetuar, dy banorët janë parë duke diskutuar drejtpërdrejt për raportin e tyre. Fuego i ka kujtuar Jonës se, kur kishte pasur interes për të, ia kishte shprehur hapur, por më pas komunikimi mes tyre kishte ndryshuar.
Reperi u shpreh gjithashtu se dëshiron të ruajnë një marrëdhënie të mirë dhe të vazhdojnë të komunikojnë, pasi kanë shumë tema të përbashkëta.
Nga ana tjetër, Jona përmendi edhe afrimin e tij me Olechkën, duke thënë se Fuego ia kishte bërë të qartë se kishte një pëlqim më të madh për të. Ajo shtoi se i kishte kuptuar arsyet e tij dhe nuk kishte asnjë keqkuptim në këtë drejtim.
Fuego, nga ana e tij, sqaroi se nuk dëshironte t’i linte asnjë hapësirë për interpretime të gabuara.
Mbetet për t’u parë nëse ky sqarim do të ndikojë në raportin e tyre dhe nëse mes Jonës dhe Fuegos do të mbetet vetëm një miqësi brenda shtëpisë së BBVK-së./mxh
