Avokati i Popullit ka monitoruar protestën e opozitës që u zhvillua të dielën në kryeqytet dhe ka dalë me një raport paraprak mbi zhvillimin e saj.
Ekipi i këtij institucioni vizitoi spitalet dhe komisariatet për të intervistuar protestuesit e ndaluar dhe ata të lënduar.
“Nga të dhënat paraprake rezulton se të paktën 12 persona të rritur janë ndaluar, ndërsa 4 të mitur janë liruar pas marrjes në pyetje”, thuhet në njoftim.
Po ashtu në raportin e Avokatit të Popullit thuhet se në Spitalin e Traumës, një protestues raportoi se ishte përdorur dhunë nga policia, për të cilën tashmë ka nisur hetimi përkatës. Raporti i detajuar do të publikohet pasi të përfundojë hetimi administrativ.
Avokati i Popullit thekson se mbështet vetëm tubimet paqësore dhe u bën thirrje forcave të rendit të tregojnë vetëpërmbajtje dhe profesionalizëm, pavarësisht situatës gjatë protestës. Ai gjithashtu nënvizon rëndësinë e transparencës për protokollet e përdorura nga policia, veçanërisht për përdorimin e gazit lotësjellës dhe mjeteve të tjera për shpërndarjen e turmave.