Last Updated on 12/08/2026 by EL
Bankierja e JP Morgan Chase që ishte një nga figurat sekrete pas planit për shitjen e aksioneve të FIFA-s po përballet gjithashtu me presion për shkak të lidhjeve të saj me financierin dhe pedofilin e ndjerë Jeffrey Epstein.
Mary Erdoes, 58 vjeçe, drejtuese e divizionit të menaxhimit të aseteve dhe pasurive, udhëhoqi përpjekjet e bankës për të gjetur investitorë të gatshëm të merrnin një pjesë të aksioneve prej 20 për qind të FIFA-s, të cilat presidenti i saj, Gianni Infantino, kërkonte t’i shiste.
Erdoes është vënë gjithashtu nën vëzhgim për lidhjen e saj të mëparshme dhe të gjatë me Epsteinin, i cili vdiq në vitin 2019. Dokumentet e publikuara nga autoritetet amerikane tregojnë se Erdoes i dha fund marrëdhënies së JP Morgan me Epsteinin vetëm në vitin 2013, pesë vjet pasi ai ishte dënuar në Florida për trafikimin e një të miture për prostitucion.
Email-et e shkëmbyera mes të dyve, të raportuara fillimisht nga faqja e lajmeve financiare “The Banker”, sugjerojnë se ata kishin kontakte lidhur me çështje bankare. Në vitin 2012, Erdoes i dërgoi Epstein-it urim për ditëlindje nga llogaria e saj në JP Morgan. Të dy kishin edhe kontakte të tërthorta përmes punonjësve në lidhje me marrëveshjet bankare të një bashkëpunëtoreje tjetër të Epstein-it, Kathryn Ruemmler, ish-drejtuese e Goldman Sachs.
Sipas “New York Times”, Erdoes besohet të jetë një nga të paktët persona që dinin për planet e Infantinos që në fazën e hartimit të tyre. Bëhej fjalë për shitjen e një pjese prej 20 për qind të aksioneve të FIFA-s, me vlerë 4.2 miliardë dollarë (3.1 miliardë paund), investitorëve të udhëhequr nga Joshua Kushner – vëllai i dhëndrit të presidentit të Shteteve të Bashkuara të Amerikës, Donald Trump, Jared Kushner – dhe investitorëve të tjerë. Infantino nuk ua zbuloi planin as bashkëpunëtorëve të tij më të afërt deri disa ditë para finales së Kupës së Botës.
Shoqëria e investimeve e Joshua Kushner, Thrive Eternal, dhe FIFA planifikonin të përdornin JP Morgan për të gjetur investitorë të tjerë për shitjen e propozuar, e cila më pas u braktis nga Infantino. Projekti Fifa Forward Enterprise (FFE) shkaktoi një reagim të madh në futbollin botëror dhe tashmë Infantino po lufton për të ardhmen e tij si president i FIFA-s. Organizata europiane e futbollit, UEFA, si edhe homologët e saj në Azi dhe në Amerikën e Veriut dhe të Amerikës Qendrore, kanë kërcënuar se do të shkëputen.
Erdoes, e cila vitin e kaluar renditej e dyta në bankë për nga niveli i të ardhuravet, me 32 milionë dollarë (24 milionë paund), nuk ka komentuar lidhjet e saj me Infantinon. Lidhja mes të dyve nuk është e qartë, megjithëse Infantino ka qenë në skenë me Erdoes kur ka folur në një mbledhje të punonjësve të bankës.
Më parë, JP Morgan kërkoi falje për rolin e saj në financimin e Superligës Europiane të vitit 2021. Banka ende nuk ka bërë ndonjë koment për rolin e saj në FFE, apo për marrëdhënien mes Erdoes, bankës dhe Infantinos. Sa u përket marrëdhënieve të Erdoes me Epstein, JP Morgan i tha The Banker: “Na vjen keq për çdo lidhje që kemi pasur me këtë person [Epstein], por nuk e ndihmuam atë të kryente krimet e tij të neveritshme. “Kompania paraqiti disa raporte për aktivitete të dyshimta, duke filluar nga viti 2002, por nuk mori asnjë përgjigje nga qeveria. Mary Erdoes mori vendimin për t’i mbyllur llogaritë e tij në vitin 2013, gjashtë vjet para arrestimit të tij. Mary ka kërkuar gjithmonë nga vetja dhe kolegët e saj standardet më të larta të integritetit dhe besimit, është vlerësuar vazhdimisht si një nga drejtueset më të mira në sektorin financiar dhe vazhdon të jetë një udhëheqëse me rëndësi kritike për kompaninë tonë.”
Ndërkohë, FIFA do të përballet me një tjetër episod të sikletshëm të mërkurën, kur Omar Artan – arbitri somalez të cilit iu refuzua hyrja në Shtetet e Bashkuara të Amerikës për Kupën e Botës – do të drejtojë Superkupën e UEFA-s, ndeshja që hap sezonin europian. Artan ka folur për “periudhën shumë të vështirë” që përjetoi pasi iu refuzua hyrja në Shtetet e Bashkuara të Amerikës në aeroportin ndërkombëtar të Miamit në qershor, përpara asaj që duhej të ishte pika kulmore e karrierës së tij.
Tensionet mes FIFA-s dhe UEFA-s ishin ndërkohë të larta përpara fillimit të Kupës së Botës, ku Infantino u përball me një shqyrtim të mëtejshëm për rolin e tij në vendimin për pezullimin e dënimit me dy ndeshje të dhënë ndaj sulmuesit të Shteteve të Bashkuara të Amerikës, Folarin Balogun. Në një lëvizje që shihej si një përpjekje e maskuar për të poshtëruar organizatën drejtuese të futbollit botëror, Artan u caktua arbitër i ndeshjes së Superkupës së së mërkurës në Salzburg, mes Aston Villa-s dhe Paris Saint-Germain.
Artan tha të hënën: “Ishte një periudhë shumë e vështirë. Shumë njerëz kanë simpati për mua, sepse kur dikush ka punuar për shumë vite dhe pritet të bëjë diçka, por më pas nuk mund ta bëjë, kjo është shumë sfiduese. E vlerësoj vërtet mbështetjen që mora nga e gjithë bota; jam shumë mirënjohës.”
Artan, 34 vjeç, iu nënshtrua një interviste 11-orëshe nga autoritetet e emigracionit, përpara se t’i refuzohej hyrja në Shtetet e Bashkuara të Amerikës. Somalia është një nga 12 vendet që ndodhen në listën e ndalimit të udhëtimit të Shteteve të Bashkuara të Amerikës. Infantino pranoi më vonë publikisht se nuk kishte fuqi ta anulonte vendimin e administratës së Donald Trump. Presidenti i FIFA-s u tha kritikëve në një konferencë për shtyp përpara Kupës së Botës që të “qetësoheshin dhe të relaksoheshin” lidhur me polemikën, duke shtuar: “Ne punojmë për gjithçka, përpiqemi të zgjidhim gjithçka, [por]të bërtiturat dhe protestat e menjëhershme janë e kundërta e gjetjes së një zgjidhjeje.”
Aleksander Čeferin, presidenti i UEFA-s, reagoi duke caktuar Artanin për Superkupën, ku ai do të bëhet zyrtari i parë afrikan që drejton ndeshjen hapëse të sezonit europian.
Artan shtoi: “Kur morëm këtë telefonatë, për mua dhe familjen time ishte vërtet një moment shumë, shumë i lumtur. Në Europë dhe në Austri ka një komunitet të madh somalez dhe ata janë jashtëzakonisht të lumtur që unë do të drejtoj një ndeshje të tillë.”/et