Last Updated on 15/10/2026 by EL
BBC i ka kërkuar një gjykate federale në Florida që të detyrojë presidentin amerikan Donald Trump të caktojë një datë për të dhënë dëshmi nën betim në kuadër të padisë prej 10 miliardë dollarësh, rreth 8.6 miliardë euro, për shpifje ndaj transmetuesit britanik.
Sipas dokumenteve gjyqësore, avokatët e Trump kishin rënë dakord që dëshmia të jepej më 16 tetor, por më pas kërkuan shtyrjen e saj deri në janar.
Avokatët e BBC-së argumentojnë se, megjithëse kanë kaluar gati tetë muaj nga nisja e fazës së mbledhjes së provave dhe janë marrë në pyetje shtatë dëshmitarë të rrjetit, ende nuk është caktuar një datë për dëshminë e Trump, i cili është figura qendrore e çështjes.
“Edhe pse kanë kaluar gati tetë muaj nga nisja e procesit të mbledhjes së provave, janë marrë në pyetje shtatë dëshmitarë të BBC-së dhe kanë mbetur vetëm dy muaj deri në përfundimin e kësaj faze, BBC ende nuk ka mundur të marrë dëshminë e paditësit dhe nuk ka asnjë kalendar për zhvillimin e saj”, thuhet në kërkesën e avokatëve.
BBC i ka kërkuar gjykatës që ta detyrojë presidentin të caktojë një datë konkrete për dëshminë dhe të trajtojë çështjen gjatë një seance të planifikuar për 22 tetor.
Në reagimin e tij, një zëdhënës i ekipit ligjor të Trump nuk komentoi arsyet e shtyrjes, por përsëriti akuzat ndaj transmetuesit britanik.
Sipas tij, presidenti po e mban BBC-në përgjegjëse për shpifje dhe ndërhyrje të pakujdesshme në zgjedhje, ashtu siç ka vepruar edhe me media të tjera që i konsideron përgjegjëse për shkelje.
Për çfarë e akuzon Trump BBC-në?
Trump ngriti padinë në dhjetor 2025, duke e akuzuar BBC-në për shpifje dhe praktika tregtare mashtruese e të padrejta lidhur me dokumentarin “Trump: A Second Chance”.
Në padinë prej 33 faqesh, presidenti amerikan pretendon se transmetuesi paraqiti një imazh të rremë, shpifës dhe dashakeq ndaj tij, duke e cilësuar dokumentarin si një përpjekje të hapur për të ndërhyrë dhe ndikuar në zgjedhjet presidenciale amerikane të vitit 2024.
Polemika lidhet me mënyrën se si BBC redaktoi pjesë të fjalimit të Trump më 6 janar 2021, duke krijuar përshtypjen se ai kishte nxitur dhunën gjatë sulmit ndaj Kapitolit amerikan.
Transmetuesi pranoi se kishte bashkuar pjesë të ndryshme të fjalimit dhe kërkoi falje për montazhin. Pas polemikave, dy drejtues të lartë të BBC-së dhanë dorëheqjen. Megjithatë, rrjeti britanik ka mohuar se ka kryer shpifje.
Trump ka shtuar sulmet ndaj mediave, duke kufizuar aksesin e disa prej tyre, duke kritikuar gazetarët që kundërshtojnë administratën e tij dhe duke ngritur padi për shuma të mëdha dëmshpërblimi.
Në prill, një gjykatës federal amerikan rrëzoi një padi prej 10 miliardë dollarësh, rreth 8.5 miliardë euro, të ngritur nga Trump kundër gazetës The Wall Street Journal, gjithashtu për shpifje.