Last Updated on 18/05/2026 by EL
Kenia po përballet me një formë të re të gjuetisë së paligjshme, ku në qendër nuk janë më fildishi apo lëkurat e kafshëve, por milingonat gjigante korrëse.
Autoritetet keniane kanë ngritur alarmin pas zbulimit të një rrjeti ndërkombëtar kontrabande që trafikon mbretëresha të specieve të rralla të milingonave afrikane drejt tregjeve evropiane dhe aziatike.
Rasti u bë publik vitin e kaluar, kur dy adoleshentë belgë u arrestuan në Kenia me afro 5,000 milingona mbretëreshë të fshehura në shiringa dhe epruveta. Ata u akuzuan për “biopirateri”, ndërsa gjykata e krahasoi trajtimin e insekteve me tregtinë historike të skllevërve.
Belgët janë gjobitur me rreth 8,000 dollarë, ndërsa muajin e kaluar një shtetas kinez u dënua me një vit burg për tentativë trafikimi të 2,000 milingonave.
Eksperti kenian i milingonave, Dino Martins, e ka cilësuar fenomenin shqetësues, duke theksuar rëndësinë ekologjike të këtyre insekteve.
Sipas tij, çdo koloni ka vetëm një mbretëreshë, e cila mund të jetojë dhe të ndërtojë folenë për më shumë se 50 vjet. Ai shtoi se milingonat luajnë rol të rëndësishëm në shpërndarjen e farave, ajrosjen e tokës dhe ushqimin e kafshëve të tjera.
Në tregun online ndërkombëtar, një mbretëreshë e specieve “Messor cephalotes” mund të shitet deri në 200 euro, ndërsa kompletet me koloni të vogla arrijnë vlera edhe më të larta. Koleksionistët dhe entuziastët e insekteve i konsiderojnë ato ekzotike dhe të rralla, çka ka nxitur rritjen e kërkesës vitet e fundit.
Një studim i tij i vitit 2017 zbuloi se më shumë se 500 lloje milingonash shiteshin online, ndërsa një pjesë e tyre mund të përbëjnë rrezik për ekosistemet ku futen ilegalisht.
Megjithatë, ekspertët theksojnë se tregtia mund të kontrollohet përmes rregullave dhe licencimit, siç ndodh në Australi.
Ata argumentojnë se mbajtja e milingonave mund të ketë vlera edukative dhe të ndihmojë njerëzit të afrohen më shumë me natyrën, por paralajmërojnë se çdo aktivitet duhet të zhvillohet në mënyrë të përgjegjshme dhe ligjore./et