Last Updated on 13/11/2026 by EL
Zëvendëspresidenti amerikan JD Vance po shqyrton seriozisht mundësinë që të mos kandidojë për president në vitin 2028, pas humbjes së rëndë të republikanëve në zgjedhjet për Kongresin më 3 nëntor. Sipas CNN, lufta jopopullore me Iranin, përçarjet mes mbështetësve të Donald Trumpit dhe angazhimet familjare kanë bërë që 42-vjeçari të vërë gjithnjë e më shumë në dyshim mundësitë e tij për të fituar.
CNN ka biseduar me rreth dhjetë aleatë dhe këshilltarë të Vance, të cilët kanë treguar se zëvendëspresidenti amerikan po e mendon gjithnjë e më seriozisht mundësinë e tërheqjes nga gara.
“Nuk do të më habiste asnjë vendim i tij”, tha një prej burimeve. “Ai është vetëm 42 vjeç. Është mjaftueshëm i ri dhe mund të rikthehet nëse rrethanat aktuale nuk i japin mundësi të ketë sukses. Ndoshta thjesht nuk është koha e tij.”
Vance ende nuk ka vendosur një afat për marrjen e vendimit, ndërsa disa prej bashkëpunëtorëve të tij vazhdojnë të besojnë se ai do të kandidojë. Këtë verë, zëvendëspresidenti u bë baba për herë të katërt, çka ka shtuar spekulimet se mund t’i shtyjë ambiciet presidenciale.
Lufta me Iranin dhe humbja e republikanëve
“Nëse nuk i japin fund luftës në Iran, asnjë republikan nuk ka shanse në vitin 2028”, deklaroi për CNN një aleat i Vance.
Lufta ka shkaktuar pakënaqësi të madhe mes votuesve amerikanë, përfshirë shumë prej atyre që mbështetën Trumpin në zgjedhjet presidenciale të vitit 2024. Vetë Vance, mëngjesin pas zgjedhjeve për Kongresin, ia atribuoi hapur humbjen e republikanëve luftës me Iranin.
“Arsyeja pse humbëm është lufta. Vetë presidenti e tha këtë mbrëmë”, shkroi Vance.
“Nëse doni të pretendoni se ia vlejti, se humbja e Senatit për gjashtë vitet e ardhshme ishte një çmim që ia vlente të paguhej, atëherë thuajeni. Jini të sinqertë. Por të gjithë e dinë pse humbëm. Çdo diskutim i sinqertë për rrugën që duhet të ndjekim më tej duhet të nisë nga kjo”, shtoi ai.
Sipas dy burimeve të njohura me bisedat mes tyre, ky qëndrim e zemëroi Trumpin, i cili i kërkoi llogari zëvendëspresidentit pse nuk kishte mbrojtur vendimin për të sulmuar Iranin.
Megjithatë, Shtëpia e Bardhë deklaroi zyrtarisht se Trump nuk kishte pasur asnjë problem me deklaratën e Vance.
“Ai kishte të drejtë, përveç një gjëje”, u tha Trump gazetarëve të dielën. “Duhej të shtonte edhe një fjali: ‘Nëse do t’ju duhej ta bënit përsëri, a do ta bënit?’ Përgjigjja është po.”
Të enjten, Trump i kërkoi Vance të tërhiqej nga procesi i negociatave me Iranin, për të cilin e kishte ngarkuar më parë, dhe të përqendrohej plotësisht te lufta kundër korrupsionit. Vance kishte mbështetur më herët përfundimin e luftës, zgjidhjen e problemit të kostos së lartë të jetesës dhe rishikimin e marrëdhënieve të Shteteve të Bashkuara me Izraelin.
“MAGA ka vdekur”
Rich Baris, një ekspert sondazhesh i afërt me lëvizjen e Trumpit, beson se shumë votues republikanë e kanë humbur besimin te presidenti, pasi ai nuk ka përmbushur premtimet për uljen e kostos së jetesës dhe shmangien e luftërave të reja.
“MAGA ka vdekur”, deklaroi Baris. “Problemi që do të ketë zëvendëspresidenti është se duhet t’i motivojë këta votues dhe t’i bëjë të besojnë përsëri, sepse Partia Republikane e ka humbur plotësisht besueshmërinë tek ata”, shtoi ai.
Bashkëpunëtorët e Vance po përpiqen të rikthejnë mbështetjen e votuesve dhe e konsiderojnë një aleat të rëndësishëm Stephen Miller, bashkëpunëtorin e Trumpit, i cili këtë javë mori drejtimin e stafit të Shtëpisë së Bardhë.
Në zgjedhjet e fundit, republikanët humbën mbështetje mes të rinjve, burrave, votuesve latinoamerikanë dhe të bardhëve pa arsim universitar. Ndërkohë, edhe figura të tjera republikane po përgatiten për garën presidenciale, mes tyre guvernatori i Floridës Ron DeSantis, senatori Ted Cruz dhe guvernatori i Xhorxhias Brian Kemp.
Komentatori konservator Tucker Carlson ka nisur gjithashtu të përmendë mundësinë e një kandidimi të pavarur.
Trump ende nuk ka vendosur kë do të mbështesë
Nëse vendos të kandidojë, Vance mund të mbështetet te donatorë të pasur si Elon Musk dhe Peter Thiel. Rrjeti i tij i donatorëve, Rockbridge Network, zhvilloi këtë javë një takim në Hjuston për të diskutuar planet e ardhshme politike.
Megjithatë, Trump ende nuk ka vendosur nëse do ta mbështesë zëvendëspresidentin e tij si pasardhës. Ai u ka thënë bashkëpunëtorëve se për momentin dëshiron të vëzhgojë kandidatët e mundshëm.
Në një intervistë për emisionin “60 Minutes” të CBS, i pyetur nëse do ta mbështeste Vance, Trump u përgjigj: “Ndoshta, por jo domosdoshmërisht”. Terry Schilling, president i organizatës konservatore American Principles Project, vazhdon të besojë se Vance duhet të hyjë në garën presidenciale.
Megjithatë, ai pranon se rezultatet e zgjedhjeve për Kongresin kanë ndryshuar plotësisht raportet brenda Partisë Republikane. “Mendoj se gara tani është plotësisht e hapur dhe se për momentin nuk ka një pasardhës të qartë”, deklaroi Schilling./ET