Gjermania dhe Franca kanë rënë dakord për një qasje të përbashkët për të garantuar të ardhmen e industrisë evropiane të automobilave, duke synuar uljen e emetimeve ndotëse dhe lehtësimin e procedurave burokratike.
Në një deklaratë të përbashkët të publikuar sot, të dyja qeveritë theksuan se synojnë të transformojnë industrinë e automobilave, pa hequr dorë nga objektivat klimatike dhe duke siguruar që makinat e së ardhmes të prodhohen në Evropë.
Marrëveshja vjen në një kohë kur prodhuesit evropianë të automjeteve po përballen me presion të madh nga importet e makinave elektrike dhe hibride me çmime konkurruese, veçanërisht nga Kina.
Propozimet franko-gjermane synojnë të forcojnë konkurrueshmërinë e industrisë evropiane përmes stimujve konkretë për investimet, kërkimin shkencor, zhvillimin teknologjik, prodhimin në Evropë dhe krijimin e zinxhirëve të furnizimit më të qëndrueshëm.
Kancelari gjerman, Friedrich Merz, e cilësoi marrëveshjen si një zhvillim të rëndësishëm për drejtuesit e automjeteve dhe punësimin në Gjermani, Francë dhe pjesën tjetër të Evropës.
Sipas tij, masat e dakordësuara përbëjnë një sinjal për investime në industri. Edhe presidenti francez, Emmanuel Macron, theksoi se objektivi i përbashkët është transformimi i sektorit automobilistik, duke ruajtur njëkohësisht ambiciet klimatike dhe prodhimin brenda Evropës.
Një nga çështjet kryesore të marrëveshjes lidhet me mundësinë e lehtësimit të ndalimit të planifikuar nga Bashkimi Evropian për regjistrimin e makinave të reja me motorë me djegie të brendshme pas vitit 2035.
Sipas një raporti të gazetës gjermane “Handelsblatt”, Merz dhe Macron kanë rënë dakord në parim që prodhuesit të detyrohen të ulin mesatarisht emetimet me 90 për qind nga viti 2035, pa qenë të detyruar të kompensojnë 10 për qindëshin e mbetur. Ky propozim mund të krijojë hapësirë për vazhdimin e prodhimit të disa automjeteve me motorë tradicionalë.
Në fund të vitit të kaluar, Komisioni Evropian propozoi mundësinë e regjistrimit të makinave të reja me motorë me djegie të brendshme edhe pas vitit 2035, duke rishikuar planin e mëparshëm për eliminimin gradual të tyre. Gjermania kishte kërkuar ndryshimin e rregullave, ndërsa Franca më parë kishte kundërshtuar lehtësimin e ndalimit.
Marrëveshja mes dy ekonomive më të mëdha të Bashkimit Evropian mund të ndihmojë në sigurimin e mbështetjes së nevojshme mes shteteve anëtare dhe institucioneve në Bruksel.
Macron shprehu shpresën se dinamika e krijuar nga bashkëpunimi franko-gjerman do të çojë shpejt në një marrëveshje me partnerët e tjerë evropianë, në interes të vendeve të punës dhe industrisë.
Megjithatë, propozimet duhet të marrin mbështetjen e nevojshme në nivel evropian përpara se të shndërrohen në rregulla të miratuara. Kështu, marrëveshja synon të gjejë një ekuilibër mes mbrojtjes së industrisë dhe punësimit, konkurrencës ndërkombëtare dhe objektivave të Bashkimit Evropian për reduktimin e ndotjes. /mxh