Presidenti amerikan Donald Trump u rikthye në darkën e Shoqatës së Korrespondentëve të Shtëpisë së Bardhë, aktiviteti tradicional i gazetarëve amerikanë, i cili këtë vit u zhvillua nën hijen e një incidenti me armë zjarri që kishte çuar në anulimin e edicionit të mëparshëm.
Në sallë ishin të pranishëm gazetarë nga disa prej mediave me të cilat Trump ka pasur përplasje të vazhdueshme, përfshirë The New York Times, CNN dhe The Wall Street Journal. Pavarësisht tensioneve mes presidentit dhe medias, disa gazetarë u vlerësuan për punën e tyre profesionale.
Presidentja në largim e Shoqatës së Korrespondentëve të Shtëpisë së Bardhë, Weijia Jiang nga CBS News, deklaroi se organizata nuk do të lejonte që dhuna të kishte “fjalën e fundit”, duke iu referuar incidentit të mëparshëm ku një person i armatosur u neutralizua gjatë përpjekjes për të hyrë në aktivitet.
Gjatë mbrëmjes, oficeri i Shërbimit Sekret amerikan Victor Gonzalez, i cili u plagos gjatë ngjarjes, u nderua me një çmim nga Presidenti Trump për veprimet e tij.
Në fjalimin e tij, Trump mbajti fillimisht një ton pajtues, duke deklaruar se respekton “shumicën” e gazetarëve dhe duke theksuar rëndësinë e lirisë së fjalës.
“Ne i zgjidhim mosmarrëveshjet tona jo me plumba, por me debat të hapur dhe të fuqishëm. Asnjë humbës i çmendur me armë nuk do ta ndryshojë kurrë këtë”, tha Trump.
Megjithatë, ai nuk i kurseu kritikat ndaj medias, duke sulmuar gazetarë dhe organizata mediatike që e kanë kundërshtuar gjatë karrierës së tij politike. Trump përdori edhe termin “Sindroma e Çrregullimit ndaj Trump”, një shprehje që ai e përdor për të përshkruar kritikët e tij.
Presidenti amerikan ironizoi gjithashtu industrinë e lajmeve, duke deklaruar se disa media do të përballen me vështirësi pasi ai të largohet nga detyra, pasi sipas tij “nuk do të kenë më për çfarë të raportojnë”.
Një nga momentet që tërhoqi vëmendjen ishte vendosja e një kapelje me mbishkrimin “Trump 2028”, duke lënë të hapur në formë shakaje mundësinë e një kandidimi të ardhshëm, pavarësisht kufizimeve kushtetuese për mandatet presidenciale.
Darka u zhvillua në një atmosferë të tensionuar mes administratës amerikane dhe mediave. Vetëm pak ditë më parë, Trump kishte kritikuar disa rrjete televizive dhe kishte kërcënuar me masa ndaj transmetuesve që nuk kishin shfaqur një nga fjalimet e tij në kohën kryesore televizive.
Edicioni i këtij viti ishte më i kufizuar krahasuar me vitet e mëparshme, me rreth 700 pjesëmarrës, ndërsa masat e sigurisë ishin të përforcuara me kontrolle të shumta dhe prani të shtuar të forcave të rendit./ad