Angelina Jolie, një nga figurat më të njohura të Hollywood-it, është bërë sërish temë diskutimi në rrjetet sociale pas një paraqitjeje të fundit në Shanghai, Kinë, ku ajo mori pjesë në një event të markës Tom Ford Beauty.
Aktorja 50-vjeçare u shfaq në një event të Javës së Modës në Shanghai, e veshur me një fustan minimalist ngjyrë të bardhë krem me rrip në bel dhe me një buzëkuq të kuq të theksuar. Ajo kishte zgjedhur një stil të thjeshtë grimi, ndërsa flokët e gjatë me nuancë bionde të çelur i binin mbi fytyrë.
Jolie ishte e pranishme si ambasadore e markës luksoze, duke promovuar koleksionin e buzëkuqve “Runway Lip Color”.
Megjithatë, pamja e saj u bë menjëherë objekt komentesh në rrjetet sociale. Disa përdorues në platformën X shprehën habi dhe dyshime, duke pretenduar se diçka në pamjen e saj dukej “ndryshe” ose “e pazakontë”.
“Kjo nuk duket aspak si Angelina që njohim,” shkroi një përdorues, ndërsa të tjerë spekuluan për ndryshime në fytyrën e saj apo ndërhyrje estetike. Disa komente shkuan më tej duke përmendur se ajo dukej “pa shprehje” ose “e ndryshuar”.
Nga ana tjetër, pati edhe përdorues që kërkuan qetësi, duke theksuar se ndryshimet në pamje mund të lidhen me moshën dhe lodhjen natyrale, dhe se nuk ka asgjë të pazakontë në mënyrën se si ajo është paraqitur.
Angelina Jolie, në intervista të mëparshme, ka mohuar vazhdimisht të ketë kryer ndërhyrje estetike, duke deklaruar në vitin 2010 se nuk ka bërë asgjë të tillë dhe nuk planifikon të bëjë në të ardhmen.
Në sfond të këtyre komenteve, aktorja vijon angazhimet e saj profesionale dhe bashkëpunimet me marka të njohura ndërkombëtare, ndërsa mbetet një nga figurat më të ndjekura dhe të diskutuara të industrisë së filmit dhe modës./mxh