Prefekti i departamentit të Varit, Simon Babre, dhe kryebashkiakja e Tulonit, Josée Massi, kanë njoftuar një paketë masash për të parandaluar përsëritjen e incidenteve të dhunshme. Masat përfshijnë pezullimin e transportit publik, kufizime për të miturit, ndalimin e protestave në zona të caktuara dhe shtimin e forcave të sigurisë.
Vendimi është marrë nga autoritetet lokale pas incidenteve të regjistruara më 17 tetor, të cilat shkaktuan dëme në disa biznese dhe rritën shqetësimet për sigurinë në qytet.
Një nga masat kryesore është pezullimi i plotë i rrjetit të transportit publik në të gjithë metropolinë Toulon Provence Méditerranée. Shërbimi do të ndërpritet nga ora 10:00 e së shtunës, 24 tetor, deri në orën 06:00 të së dielës, 25 tetor.
Nga ora 18:00 e së shtunës deri në orën 06:00 të së dielës, të miturve nuk do t’u lejohet të qarkullojnë pa shoqërimin e një personi përgjegjës në disa zona të përcaktuara të Tulonit dhe pranë qendrave tregtare.
Kufizimet parashikojnë përjashtime për raste të justifikuara, si lëvizjet për arsye pune, shëndetësore ose familjare, si dhe kthimin në banesë.
Autoritetet kanë vendosur gjithashtu ndalimin e protestave, marshimeve dhe grumbullimeve me karakter protestues në një perimetër të përcaktuar të qendrës së Tulonit, nga ora 11:00 deri në orën 23:59 të 24 tetorit.
Sipas autoriteteve, mungesa e organizatorëve të identifikuar dhe pasiguria lidhur me zhvillimin e tubimeve e bëjnë më të vështirë planifikimin e masave të sigurisë. Megjithatë, ndalimi nuk përbën mbyllje të përgjithshme të qendrës së qytetit dhe aktivitetet e zakonshme tregtare do të mund të vijojnë.
Masat e sigurisë përfshijnë edhe ndalimin e blerjes, shitjes, mbajtjes, transportit dhe përdorimit të fishekzjarrëve të kategorive F2 dhe F3. Ky kufizim do të zbatohet në të gjithë departamentin e Varit deri më 26 tetor.
Në të njëjtën periudhë do të ketë kufizime për disa substanca të ndezshme dhe produkte të rrezikshme, ndërsa nga ora 11:00 e 24 tetorit deri në orën 08:00 të 26 tetorit do të ndalohet edhe mbajtja apo transporti pa arsye të ligjshme i armëve dhe objekteve që mund të përdoren si mjete goditëse.
Për të shmangur dëmtime të tjera të pronës, bashkia do të kufizojë me 50% sipërfaqen e tarracave të kafeneve në qendrën e vjetër të Tulonit. Gjithashtu, kontejnerët e mbeturinave do të hiqen përkohësisht nga hapësirat publike gjatë natës mes 23 dhe 24 tetorit.
Policia do të shtojnë praninë në terren, ndërsa do të merren masa të posaçme për mbrojtjen e bizneseve që u dëmtuan gjatë incidenteve të mëparshme. Sipas të dhënave të bëra publike nga bashkia, 13 biznese u prekën nga ngjarjet e 17 tetorit.
Pavarësisht situatës, autoritetet nuk kanë vendosur mbylljen e detyrueshme të dyqaneve. Tregtarët do të vendosin vetë nëse do të ushtrojnë aktivitetin e tyre gjatë së shtunës.
Masat synojnë të parandalojnë përshkallëzimin e situatës dhe të garantojnë sigurinë e banorëve, vizitorëve dhe bizneseve në Tulon. Disa prej kufizimeve do të jenë në fuqi edhe përtej datës 24 tetor./ad