Last Updated on 20/11/2026 by EL
Ministri gjerman i Mbrojtjes, Boris Pistorius, kërkoi personalisht falje për cilësimin “budallaqe” që përdori lidhur me kritikat e një zyrtari amerikan ndaj sulmeve ukrainase brenda territorit të Rusisë. Pavarësisht tërheqjes nga formulimi i përdorur, ai bëri të qartë se vazhdon të mbështesë këto operacione të Ukrainës, duke theksuar se Berlini dhe Uashingtoni kanë qëndrime të ndryshme për strategjinë e luftës.
“Kam kërkuar falje për zgjedhjen e fjalëve të mia”, deklaroi Pistorius në një intervistë telefonike për Politico. Siç zbuloi ai, të mërkurën në mbrëmje kishte zhvilluar një bisedë telefonike me Elbridge Colby, zyrtarin më të lartë të Pentagonit për çështjet e politikave të mbrojtjes.
Megjithatë, ministri gjerman sqaroi se nuk e ka ndryshuar qëndrimin e tij lidhur me sulmet ukrainase.
“Gjithashtu ia bëra të qartë, dhe ai e kupton në të njëjtën mënyrë, se ne thjesht kemi pikëpamje të ndryshme për këtë çështje. Jemi dakord që të mos biem dakord”, u shpreh ai.
Kërkimi i faljes pasoi një ngërç publik të martën në një takim në Bruksel të vendeve që mbështesin ushtarakisht Ukrainën. Colby vuri në dyshim efektivitetin e sulmeve me rreze të gjatë veprimi të Ukrainës ndaj infrastrukturës ruse të naftës dhe objektivave të tjerë, duke argumentuar se ato kanë bërë pak për t’i dhënë fund luftës ose për të ndaluar përparimin rus.
Në një konferencë të përbashkët për shtyp pas takimit, Pistorius i kishte përshkruar kritikat ndaj sulmeve ndaj objektivave strategjike ushtarake në Rusi si “mjaft budallallëqe”.
Pra, sot, ai pranoi se formulimi i tij ishte i papërshtatshëm, duke shpjeguar se, meqenëse po i përgjigjej një pyetjeje në anglisht, nuk zgjodhi shprehjen e saktë.
“Nuk duhej ta kisha bërë këtë”, pranoi ai.
Në takimin e së martës, Sekretari Britanik i Mbrojtjes, Wes Streeting, gjithashtu mbrojti Ukrainën, duke mos u pajtuar me Colbyn, por me tone më të buta.
“Nuk është puna jonë t’i tregojmë Ukrainës se si ta luftojë luftën e saj”, tha ai.
Ngërçi nxori në pah dallimet midis Uashingtonit dhe Berlinit mbi strategjinë ushtarake të Ukrainës, në një kohë kur Gjermania po financon zhvillimin dhe prodhimin e armëve me rreze të gjatë veprimi për Kievin dhe është mbështetësi i saj më i madh financiar.
Pistorius tha se mosmarrëveshja me zyrtarin amerikan nuk do të ndikonte në bashkëpunimin mbrojtës të të dy vendeve, të cilin ata kërkojnë ta forcojnë përmes programeve të përbashkëta të prodhimit të armëve. Shtetet e Bashkuara gjithashtu furnizojnë Gjermaninë me sisteme kritike armësh, duke përfshirë sistemet anti-ajrore Patriot dhe avionët luftarakë F-35.
“Ne jemi aleatë dhe partnerë. Megjithatë, kjo nuk do të thotë që duhet të biem dakord për gjithçka”, vuri në dukje ai, duke e përshkruar Colbyn si një bashkëbisedues të rëndësishëm dhe duke folur për komunikim të ngushtë me të dhe me Sekretarin e Mbrojtjes të SHBA-së, Pete Hegseth./et
