Ministri gjerman i Mjedisit, Carsten Schneider, premtoi sot gjatë një vizite në Kiev se Gjermania do të ndihmojë Ukrainën për riparimin e dëmeve në strukturën mbrojtëse që mbulon vendin e katastrofës bërthamore të Çernobilit.
“Gjermania qëndron fuqishëm në krah të Ukrainës”, tha Schneider.
Ministri do të vizitonte zonën e përjashtimit përreth centralit bërthamor të Çernobilit, ku në vitin 1986 ndodhi aksidenti katastrofik bërthamor.
Harku gjigant prej çeliku që mbulon reaktorin e shkatërruar u dëmtua nga një sulm me dron gjatë luftës aktuale ruso-ukrainase.
“Struktura mbrojtëse e dëmtuar mbi reaktorin e shkatërruar duhet të riparohet”, deklaroi Schneider.
Sipas ekspertëve, funksioni mbrojtës i strukturës prej çeliku nuk është më i garantuar plotësisht.
Administrata e objektit e vlerëson koston e riparimeve në rreth 580 milionë dollarë.
Sipas një deklarate të ministrisë së tij, Schneider tha se riparimet do të jenë jashtëzakonisht komplekse dhe do të kërkojnë një përpjekje të përbashkët ndërkombëtare.
“Një proces që përfshin vendet e G7 tashmë ka filluar”, tha ai.
Schneider deklaroi gjithashtu se Gjermania mbështet Ukrainën në rrugën e saj drejt anëtarësimit në Bashkimin Evropian.
Ministri shoqërohej nga një delegacion biznesi të interesuar për investime në Ukrainë.
“Kjo është veçanërisht e rëndësishme tani”, tha ai, duke iu referuar situatës së rënduar për popullsinë civile.
Sipas Schneider, korriku ishte një nga muajt më të vështirë për popullsinë civile që nga fillimi i agresionit rus, duke shënuar numrin më të lartë të viktimave civile që nga maji 2022.
Ai theksoi se Gjermania ka shumë për t’i ofruar Ukrainës në fushën e teknologjive të gjelbra.
“Të dyja palët përfitojnë nga kjo; Ukraina siguron infrastrukturë moderne dhe rezistente, ndërsa kompanitë gjermane fitojnë një treg të rëndësishëm të së ardhmes”, tha ministri./mxh