Last Updated on 08/06/2026 by EL
Një stacion metroje në Moskë është kthyer në një nga vendet më të preferuara për dasma. Në vend të sallave luksoze, qindra çifte po zgjedhin Mayakovskaya, stacionin historik që në mbrëmje transformohet nga një nyje transporti në një ambient elegant ceremonial.
I hapur në vitin 1938, Mayakovskaya konsiderohet një nga stacionet më të bukura të metrosë së Moskës. Me kolonat prej mermeri, llambadarët dhe pikturat dekorative në tavan, ai ngjan më shumë me një sallë madhështore sesa me një stacion të zakonshëm transporti publik.
Fenomeni ka tërhequr vëmendjen edhe të mediave ndërkombëtare. Fotografi të publikuara nga AFP tregojnë çifte që realizojnë portretet e dasmës në shkallë, në platformë dhe pranë vagonëve të metrosë.
Në mbrëmje të caktuara, stacioni mbyllet për udhëtarët dhe shndërrohet në një sallë ceremonish. Sipas autoriteteve të Moskës, deri më tani aty janë zhvilluar 106 martesa.
“Për shumë orë bëhen përgatitje të kujdesshme për të krijuar atmosferën e duhur. Puna mbetet e padukshme për pasagjerët, por është ajo që e bën ceremoninë të veçantë”, tha zëvendëskryebashkiaku i Moskës, Maksim Liksutov.
Vetëm më 22 mars, tre çifte zgjodhën të martoheshin në Mayakovskaya, sipas zyrtarëve lokalë.
Përveçse një vend i veçantë për dasma, stacioni ka edhe një histori të pasur. Gjatë Luftës së Dytë Botërore ai u përdor si qendër komanduese e forcave ajrore sovjetike, ndërsa më vonë u bë frymëzim për serinë e njohur të romaneve postapokaliptike “Metro 2033”, “Metro 2034” dhe “Metro 2035”./ET