Instituti i Gjeoshkencave (IGJEUM) ka paralajmëruar se rreziku i zjarreve në Shqipëri do të mbetet i lartë gjatë ditës së mërkurë, si pasojë e temperaturave të larta dhe mungesës së reshjeve.
Sipas parashikimit, niveli i rrezikut do të jetë i lartë në qarqet Lezhë, Durrës, Tiranë, Elbasan, Fier, Berat, Korçë, Vlorë dhe Gjirokastër.
IGJEUM bën të ditur se gjatë pasdites së sotme dhe ditës së nesërme nuk priten reshje shiu në të gjithë territorin e vendit. Temperaturat maksimale do të arrijnë deri në 37°C në zonat e ulëta, 34°C në bregdet dhe 33°C në zonat malore, duke krijuar kushte të favorshme për përhapjen e zjarreve.
Autoritetet u bëjnë thirrje qytetarëve të tregojnë kujdes maksimal, të shmangin ndezjen e zjarreve në ambiente të hapura dhe çdo veprim që mund të shkaktojë përhapjen e flakëve./ad