John Cena ka bërë një rrëfim të sinqertë për vitet e para të përpjekjeve të tij për t’u bërë pjesë e Hollywood-it, duke pranuar se në atë periudhë aktrimi nuk ishte prioriteti i tij.
Ylli i WWE-së, sot një prej emrave të njohur edhe në kinematografi, kujtoi fillimet e tij në ekran gjatë një interviste në “3rd Hour of Today”. Cena debutoi në një film artistik në vitin 2006 me “The Marine”, por rrëfeu se asokohe ishte shumë më i lidhur me botën e wrestling-ut.
Sipas tij, në moshën 20-vjeçare ai e kishte të qartë se ku donte të ishte: në ring.
“Kur nisa, nuk e kisha zemrën aty”, pranoi Cena, duke shpjeguar se për të emocionet e performancës live ishin shumë më të forta.
Ai kujtoi netët kur udhëtonte nga një shtet apo shtet tjetër dhe performonte përpara mijëra fansave. Reagimi i publikut dhe ritmi i vazhdueshëm i WWE-së ishin pikërisht ajo që e bënte të ndihej në vendin e duhur.
Kalimi nga ring-u në një set filmi, megjithatë, nuk ishte aspak i lehtë për të. Cena tha se procesi i xhirimeve i dukej tepër i ngadaltë dhe se, në atë fazë të jetës, nuk kishte ende pjekurinë për ta kuptuar mënyrën se si funksiononte industria e filmit.
Madje, ai e pranon pa rezerva se mungesa e interesit i kushtoi mundësinë për të vazhduar në Hollywood.
“U përzura nga industria e filmit sepse nuk më interesonte. Dhe sinqerisht, ishte e drejtë. Nëse nuk të intereson diçka, duhet t’ia lësh vendin dikujt që e dëshiron”, tha aktori.
Por historia nuk përfundoi aty.
Me kalimin e viteve, Cena ndryshoi qasje, fitoi eksperiencë dhe, mbi të gjitha, nisi të dashurohej me profesionin e aktrimit. Sot ai e konsideron veten me fat që pati mundësinë për të provuar sërish.
“Më pas u bëra jashtëzakonisht i apasionuar pas asaj që bëj. Jam shumë me fat që më është dhënë një mundësi e dytë. Dhe u deshën 20 vite për ta ndërtuar këtë”, u shpreh ai.
Karriera e tij në kinema tashmë përfshin produksione të suksesshme si “Trainwreck”, “The Suicide Squad”, “Barbie” dhe “Fast X”, duke e kthyer Cenën nga një yll i ringut në një aktor të konsoliduar në Hollywood.
Për të, suksesi i një filmi nuk varet vetëm nga aktorët që shfaqen në ekran. Cena theksoi se çdo pjesëtar i ekipit ka një rol thelbësor në krijimin e një produksioni, nga teknikët dhe ndriçuesit te regjisorët, stafi i prapaskenës dhe ekipet që kujdesen për çdo detaj.
“Duhet të shohësh veten në pasqyrë”
Gjatë bisedës, bashkëmoderatori Craig Melvin vuri në dukje aftësinë e Cenës për të reflektuar mbi veten dhe për të pranuar edhe gabimet e së kaluarës.
Cena u shpreh se vetëanaliza është një pjesë e rëndësishme e rritjes personale.
“Duhet të bësh një bilanc të vetes, të shohësh veten në pasqyrë, të pranosh pikat e forta dhe dobësitë e tua dhe të përpiqesh të jesh më i mirë se dje”, tha ai.
Një qasje që duket se ka qenë vendimtare në transformimin e John Cenës nga një sportist që thjesht provoi kinemanë, në një aktor që sot e konsideron Hollywood-in një pjesë të rëndësishme të karrierës së tij./mxh