Një kapitull i ri ka nisur për Juliana Nurën, e cila është bërë nënë për herë të parë, duke sjellë në jetë binjakët e saj.
Ishte vetë Juli ajo që zgjodhi ta ndajë lajmin me ndjekësit, përmes një postimi në Instagram ku publikoi edhe imazhet e para me dy foshnjat. Me emocion, ajo i prezantoi për herë të parë të vegjlit e saj, duke shoqëruar fotot me fjalët: “I solla në jetë dy mrekullitë e mia… vetëm”.
Rruga deri në këtë moment nuk ka qenë aspak e lehtë. Juliana ka kaluar më shumë se tri javë në spital, nën monitorimin e mjekëve, ndërsa priste me padurim ardhjen në jetë të binjakëve. Gjatë kësaj kohe, ajo ka ndarë herë pas here me publikun momente nga pritja, përgatitjet dhe emocionet që shoqëruan shtatzëninë.
Në rrëfimin e saj të fundit, Juli e ka cilësuar këtë periudhë si një ndër përvojat më të vështira, por edhe më të bukura të jetës. Frika, lodhja dhe lotët kanë qenë pjesë e rrugëtimit, por gjithçka duket se është zbehur në çastin kur ajo më në fund ka mbajtur në krahë dy fëmijët e saj.
Një pjesë e rëndësishme e mesazhit të saj lidhet edhe me forcën që ka gjetur brenda vetes gjatë këtij udhëtimi. Duke folur për përvojën e amësisë së vetme, Juliana ka përcjellë një mesazh të drejtpërdrejtë për gratë:
“Një grua është më e fortë nga sa mendon”.
Për Julianën, kjo përvojë ka qenë dëshmi se edhe në momentet kur gjithçka duket e vështirë, një grua mund të gjejë forcën për t’u ngritur dhe për të vazhduar përpara.
Sot, pas javësh pritjeje dhe pasigurie, gjithçka ka marrë një tjetër kuptim. Juli ka në krahë dy foshnjat e saj dhe ka nisur zyrtarisht një nga kapitujt më të rëndësishëm të jetës.
“Mirë se erdhët në jetën time, dy dashuritë e mia të vogla”, shkroi ajo, duke i dhënë fund me këto fjalë emocionuese një pritjeje të gjatë./mxh