Last Updated on 06/11/2026 by Klara
Një avion i kompanisë ajrore Ryanair, që udhëtonte nga Roma drejt Lisbonës, është përballur me një alarm sigurie pas një telefonate që paralajmëronte për praninë e një pajisjeje shpërthyese në bord.
Sipas CNN Portugal, Policia e Sigurisë Publike në Portugali (PSP) mori një telefonatë nga një person i prezantuar si zyrtar i forcave të rendit, i cili paralajmëroi për një bombë të mundshme në avion. Identiteti i telefonuesit raportohet se është verifikuar nga Policia Gjyqësore (PJ).
Avioni u ul në aeroportin Humberto Delgado të Lisbonës pak para orës 08:00 të mëngjesit të së premtes, duke vënë në lëvizje autoritetet. Aktualisht po hetohen rrethanat e kërcënimit, ndërsa deri tani nuk ka asnjë konfirmim për praninë e lëndëve shpërthyese në bord.
Incidenti i fundit vjen pas një vale kërcënimesh për bomba që të enjten prekën të paktën 25 fluturime në vende të ndryshme të Europës. Zyrtarët e Bashkimit Europian kanë deklaruar se është ende herët për të përcaktuar nëse këto incidente kanë lidhje me njëri-tjetrin.
E kontaktuar nga Euronews, Aeroporti i Lisbonës i ka drejtuar pyetjet te Policia e Sigurisë Publike, e cila ende nuk e ka konfirmuar zyrtarisht incidentin. Euronews ka tentuar gjithashtu të kontaktojë Policinë Gjyqësore, por nuk ka marrë ende një përgjigje./k.m