Analisti politik Afrim Krasniqi vë në dukje një praktikë interesante të Kosovës në trajtimin e konflikteve kushtetuese. Sipas tij, vendimi i fundit i Gjykatës Kushtetuese të Kosovës lidhur me dekretin e Presidentes për shpërndarjen e parlamentit pas dështimit për zgjedhjen e Presidentit të ri, është një shembull i qartë i kësaj praktike.
“Vlera më e rëndësishme e vendimit është sqarimi shterues lidhur me mënyrën sesi duhet bërë zgjedhja e Presidentit, debatin mbi pjesëmarrjen e deputetëve dhe kushtëzimin e zgjedhjeve të parakohshme në rast konsumimi pa sukses të afateve kushtetuese për zgjedhjen e Presidentit,” thekson Krasniqi. Ai shton se vendimi ishte unanim, duke i dhënë një peshë të madhe legjitimimit të tij.
Krasniqi kujton gjithashtu se Gjykata Kushtetuese e Kosovës nuk është e panjohur për vendime të guximshme, duke përmendur rastet kur ka shkarkuar dy Presidentë për papajtueshmëri.
Analisti shprehet: “Urojmë që ndonjë ditë Gjykata Kushtetuese e Republikës së Shqipërisë të ketë aftësinë, integritetin dhe vullnetin për të marrë vendime të tilla në parandalim dhe zgjidhje të krizave kushtetuese dhe politike, dhe në garantimin e funksionalitetit kushtetues të shtetit – edhe kur vendimi mund të krijojë pakënaqësi tek aktorët e ndryshëm politikë.”