Studimet tregojnë për një rënie shqetësuese të demokracisë globale dhe për nevojën urgjente për të mbrojtur pavarësinë e medias.
Studimet e reja zbulojnë një rënie të lirisë së shprehjes në një peizazh global që po merr gjithnjë e më shumë pamje autokratike.
Në shumë vende, organizatat mediatike po përballen me presion politik në rritje dhe gazetarët me ngacmime personale.
Një peizazh mediatik pluralist dhe i fortë është i nevojshëm për të mbrojtur demokracinë dhe për të ulur cenueshmërinë ndaj demagogjisë.
Po jetojmë në një kohë sfiduese, kur gjendja e demokracive në botë po përkeqësohet. Duhet një debat i gjerë në mbrojtje të demokracisë dhe të lirisë së medias, e cila është e domosdoshme që demokracia të funksionojë.
Gjendja e demokracisë globale nuk ka qenë kaq e dobët prej gati 50 vitesh. Udhëheqësit autoritarë po fitojnë terren. Demokracia po shtyhet pas dhe liria e shprehjes nuk mund të merret më si e mirëqenë në shumë vende. Erozioni shpesh nis me kufizimet ndaj lirisë së medias.
Pak javë më parë, Instituti V-Dem në Universitetin e Goteborgut publikoi raportin e tij vjetor, që hartëzon gjendjen e demokracisë në botë.
Situata nuk ka qenë kaq e keqe që nga viti 1978. Vetëm brenda një viti, liria e shprehjes ka rënë në 44 vende. Në botë ka 92 autokraci dhe 87 demokraci.
Në mënyrë domethënëse, 74% e popullsisë së botës jeton në autokraci dhe vetëm 7% në demokraci liberale.
Studiuesit në Goteborg dhe kolegët e tyre në mbarë botën janë të qartë: ora po kthehet pas me një ritëm alarmues, përfshirë edhe Europën.
Shtatë vende të Bashkimit Europian po kalojnë proces autokratizimi. Gjetjet duhet të shkaktonin reagim të fortë shumë përtej rretheve të zakonshme.
Megjithatë, nuk ka pasur tituj të mëdhenj, as debat publik të qëndrueshëm. Gradualisht, po dëshmojmë normalizimin e ndryshimeve që dikur do të ishin të paimagjinueshme. / WEF