Last Updated on 05/11/2026 by Monika
Humbja e republikanëve në zgjedhjet e mesit të mandatit në Shtetet e Bashkuara ka sjellë largimin e parë të rëndësishëm nga drejtimi i partisë në Kongres. Mike Johnson, kryetari republikan i Dhomës së Përfaqësuesve dhe një nga aleatët më të afërt të Donald Trumpit, ka vendosur të mos kandidojë për drejtimin e grupit parlamentar republikan në legjislaturën e re.
Vendimi, i bërë i ditur të mërkurën, më 4 nëntor, u konfirmua nga burime pranë Johnsonit për Associated Press, Reuters dhe mediat amerikane. Ai vjen menjëherë pas zgjedhjeve të 3 nëntorit, në të cilat demokratët morën kontrollin e Dhomës së Përfaqësuesve, duke i dhënë fund shumicës republikane.
Johnson ia komunikoi vendimin stafit të tij gjatë një bisede telefonike të mërkurën në mëngjes, pasi kishte folur më parë me presidentin Trump, sipas raportimeve të mediave amerikane.
Largimi i tij nga drejtimi i republikanëve nuk nënkupton dorëheqje nga Kongresi. Johnson fitoi sërish mandatin si deputet i Luizianës dhe pritet ta mbajë atë kur Kongresi i ri të mblidhet në janar 2027.
Vendimi përbën një kthesë nga deklaratat e tij të mëparshme. Gjatë muajit tetor, Johnson kishte pohuar se synonte të vazhdonte drejtimin e republikanëve edhe nëse partia humbiste shumicën. Megjithatë, rezultati i zgjedhjeve dhe perspektiva e drejtimit të një pakice parlamentare duket se kanë ndryshuar planet e tij.
Johnson mori drejtimin e Dhomës së Përfaqësuesve në tetor 2023, pas shkarkimit historik të Kevin McCarthy-t nga republikanët. Ai arriti të siguronte mbështetjen e fraksioneve të ndryshme të partisë, pas disa javësh përplasjesh të brendshme.
Gjatë drejtimit të Dhomës, Johnson u shndërrua në një prej mbështetësve kryesorë të Trumpit në Kongres, duke ndihmuar në miratimin e pjesëve të rëndësishme të agjendës së tij legjislative dhe duke mbrojtur administratën nga nisma të kundërshtarëve demokratë.
Por humbja e shumicës republikane ka hapur tashmë një përplasje të re për drejtimin e partisë në Dhomën e Përfaqësuesve.
Dy prej figurave më të njohura republikane, Steve Scalise, aktualisht kreu i shumicës parlamentare, dhe Jim Jordan, kryetar i Komisionit të Drejtësisë, kanë shprehur synimin për të marrë drejtimin e grupit republikan.
Të dy kishin tentuar të siguronin postin e kryetarit të Dhomës së Përfaqësuesve në vitin 2023, por përplasjet mes fraksioneve republikane kishin hapur rrugën për zgjedhjen e Johnsonit.
Zgjedhjet e brendshme për drejtuesin e ri republikan pritet të zhvillohen më 10 nëntor. Ndërkohë, vëmendja është përqendruar edhe te qëndrimi i Donald Trumpit, mbështetja e të cilit mund të ndikojë në garën mes kandidatëve.
Demokratët, nga ana tjetër, po përgatiten të propozojnë Hakeem Jeffries për postin e kryetarit të ri të Dhomës së Përfaqësuesve. Zgjedhja formale do të zhvillohet me nisjen e legjislaturës së re, më 3 janar 2027.
Johnson do të vazhdojë të mbajë postin aktual deri në përfundimin e kësaj legjislature. Por vendimi për të mos kërkuar drejtimin e republikanëve në Kongresin e ardhshëm shënon pasojën e parë të drejtpërdrejtë në udhëheqjen parlamentare të partisë pas humbjes së zgjedhjeve.
Tre vjet më parë, përplasjet mes republikanëve e sollën Mike Johnsonin në krye të Dhomës së Përfaqësuesve. Sot, humbja e shumicës po hap një tjetër betejë brenda së njëjtës parti, këtë herë për të vendosur kush do ta drejtojë opozitën ndaj shumicës së re demokrate./mxh