Kryeministri i Hungarisë, Viktor Orban, deklaroi të hënën, më 5 janar, se vendimi i Shteteve të Bashkuara për të rrëzuar nga pushteti udhëheqësin venezuelian Nicolas Maduro pritet të ketë ndikim pozitiv në tregjet globale të energjisë.
Duke folur në një konferencë vjetore për mediat ndërkombëtare, Orban tha se Shtetet e Bashkuara dhe Venezuela, së bashku, do të kontrollonin deri në gjysmën e rezervave botërore të naftës.
Deklaratat e tij vijnë pas ndërhyrjes më të madhe amerikane në Amerikën Latine që nga pushtimi i Panamasë në vitin 1989. Forcat speciale amerikane ndërhynë gjatë fundjavës në Karakas, arrestuan Nicolas Maduron dhe e dërguan atë në Nju Jork për t’u përballur me akuza për trafik droge.
Presidenti amerikan Donald Trump, aleat politik i Orbanit, ka bërë të qartë se synon të përfitojë nga pasuritë energjetike të Venezuelës. Administrata e tij e ka përjashtuar gjithashtu Hungarinë nga sanksionet amerikane mbi energjinë ruse për vitin zgjedhor 2026 në Hungari.
“Së bashku me Venezuelën, Shtetet e Bashkuara mund të kontrollojnë rreth 40 deri në 50 për qind të rezervave botërore të naftës. Kjo është një fuqi që mund të ndikojë ndjeshëm çmimet globale të energjisë.”
Orban shtoi se vendosja e Venezuelës nën kontrollin amerikan mund të sjellë një situatë më të favorshme energjetike për Hungarinë, duke e cilësuar këtë si lajm të mirë për vendin e tij.
Ndërkohë, Budapesti ka shkaktuar kritika nga disa vende të Bashkimit Evropian dhe NATO-s, duke vazhduar importin e naftës dhe gazit rus, edhe pse ka ndërmarrë hapa për diversifikimin e burimeve të furnizimit me energji./mxh