Last Updated on 27/10/2026 by EL
Këngëtari kanadez Neil Young ka ngritur një padi prej 10 milionë dollarësh kundër komitetit politik të Donald Trump, duke e akuzuar për shkelje të të drejtave të autorit pas përdorimit të këngës së tij “Rockin’ in the Free World” në tubimet elektorale. Padia vjen gjashtë vjet pas një marrëveshjeje të mëparshme mes palëve për të njëjtën këngë.
Legjenda e rokut kanadez Neil Young ka ndërmarrë sërish veprime ligjore kundër komitetit politik të presidentit amerikan Donald Trump, Trump 47 Committee Inc., për përdorimin e paautorizuar të këngës së tij të vitit 1989, e cila është përdorur shpesh si muzikë hyrëse gjatë shfaqjeve publike të Trump.
Young kërkon 10 milionë dollarë dëmshpërblim, rreth 8.9 milionë euro, si dhe ndalimin e përdorimit të këngës në aktivitetet publike të organizuara nga ekipi i presidentit amerikan.
Padia u depozitua të hënën dhe, sipas revistës Variety, ngre pretendimin se përdorimi i këngës nga komiteti politik shkel kushtet e një marrëveshjeje të mëparshme. Në vitin 2020, Young dhe kompania e tij botuese, Silver Fiddle Music, kishin paditur fushatën presidenciale të Trump për shkelje të të drejtave të autorit.
Muzikanti e tërhoqi padinë vetëm pasi palët arritën një marrëveshje, sipas së cilës fushata e Trump angazhohej të mos përdorte më këngën “Rockin’ in the Free World” pa marrë lejen përkatëse.
“Komiteti nuk ka aktualisht dhe nuk kishte as në kohën e tubimit në Youngstown, apo në ndonjë tubim tjetër të financuar dhe organizuar prej tij, licencë ose leje nga Young për ta luajtur këngën në ndonjë aktivitet politik publik”, thuhet në padinë e re.
Dokumenti thekson gjithashtu se përdorimi i këngës bie ndesh me mesazhin e saj kritik ndaj politikës republikane dhe shoqërisë amerikane.
Young e shkroi këngën gjatë presidencës së George H. W. Bush, duke vënë në pikëpyetje kontradiktat e politikës amerikane dhe të ashtuquajturës “Ëndrra Amerikane”.
“‘Rockin’ in the Free World’ është një himn i fuqishëm që vë përballë premtimet boshe të retorikës politike amerikane me realitetin e ashpër të të varfërve, të pastrehëve dhe të harruarve”, thuhet në dokumentin e padisë.
Sipas padisë, teksti përshkruan skena të vështira të jetës në rrugë, ndërsa refreni përdor ironinë për të vënë në pikëpyetje një liri që nuk është e barabartë për të gjithë.
Dokumenti pretendon se mesazhi i këngës është në kundërshtim të plotë me qëndrimet e Donald Trump.
Padia pretendon gjithashtu se Young ka pësuar dhe vazhdon të pësojë dëme si pasojë e shkeljes së pretenduar të të drejtave të autorit. Sipas tij, përdorimi i këngës ka dëmtuar reputacionin dhe imazhin e tij, duke krijuar përshtypjen se ai mbështet në njëfarë mënyre presidentin amerikan.
Neil Young ka qenë prej kohësh një kritik i hapur i Trump. Vitin e kaluar, ai doli në mbrojtje të Bruce Springsteen dhe Taylor Swift, pasi presidenti amerikan i kishte kritikuar të dy artistët dhe kishte bërë kërcënime ndaj tyre.
Në një reagim të publikuar në faqen e tij Neil Young Archives, muzikanti akuzoi Trump se po e dëmtonte Amerikën dhe i kërkoi të përqendrohej te problemet e vendit, përfshirë vdekjen e fëmijëve në Gaza dhe pasojat e vendimeve të administratës së tij.
“Bruce dhe mijëra muzikantë mendojnë se po shkatërron Amerikën. Merre me këtë problem, në vend që të shqetësohesh për fëmijët që po vdesin në Gaza. Ky është problemi yt. Unë nuk kam frikë prej teje. As pjesa tjetër e jona”, shkroi Young.
Ai kritikoi gjithashtu administratën Trump për mënyrën e trajtimit të Agjencisë Federale të Menaxhimit të Emergjencave (FEMA), duke i kërkuar presidentit të përqendrohej te problemet e vendit dhe jo te deklaratat e muzikantëve.
Në fillim të këtij viti, Young ofroi gjithashtu një vit akses falas në arkivin e tij muzikor për banorët e Groenlandës, pas kërcënimeve të Trump për aneksimin e territorit.
“Jam i nderuar t’u ofroj një vit akses falas në neilyoungarchives.com të gjithë miqve tanë në Groenlandë. Shpresoj që muzika dhe filmat e mi muzikorë të lehtësojnë stresin dhe kërcënimet e pajustifikuara që po përjetoni”, shkroi ai.
Neil Young nuk është i vetmi artist që ka kundërshtuar përdorimin e muzikës nga Trump
Një numër i madh artistësh të njohur kanë kundërshtuar përdorimin e këngëve të tyre në tubimet dhe aktivitetet politike të Trump pa autorizimin e tyre. Mes tyre janë Creedence Clearwater Revival, Tom Petty, The Rolling Stones, Adele, Foo Fighters, Céline Dion, The White Stripes dhe ABBA.
Në vitin 2016, Bruce Springsteen kundërshtoi përdorimin e këngës së tij “Born in the U.S.A.” si një himn patriotik nga Trump, duke qenë se ajo është një kritikë e fortë ndaj mënyrës se si u trajtuan veteranët e Luftës së Vietnamit.
Në vitin 2018, Rihanna kërkoi që Trump të ndalonte përdorimin e këngës “Don’t Stop the Music”, pasi ajo ishte luajtur në një tubim të tij. Edhe grupi R.E.M. reagoi ashpër ndaj përdorimit të këngëve “Losing My Religion”, “Everybody Hurts” dhe “It’s the End of the World as We Know It (And I Feel Fine)” në aktivitetet politike.
Në vitin 2020, trashëgimtarët e Leonard Cohen kritikuan përdorimin e paautorizuar të këngës “Hallelujah” gjatë Konventës Kombëtare Republikane, pasi kishin refuzuar shprehimisht dhënien e lejes. Ata shtuan me ironi se e vetmja këngë e Cohen që do të kishin marrë realisht në konsideratë për këtë qëllim ishte “You Want It Darker”.
Në qershor, edhe Ariana Grande iu bashkua artistëve që kundërshtojnë përdorimin e muzikës së tyre nga administrata Trump. Këngëtarja kritikoi Shtëpinë e Bardhë për përdorimin e një prej këngëve të saj në një postim në rrjetet sociale që promovonte arrestimet e kryera nga agjencia amerikane e imigracionit dhe doganave, ICE.
“Ju lutem, mos e përdorni kurrë muzikën time në lidhje me këto veprime barbare, çnjerëzore dhe të neveritshme. Në dreq me ICE-n”, shkroi Grande.