Në Guinea-Bissau, sot më 26 nëntor 2025, një grup oficerësh ushtarakë njoftuan se kanë marrë kontrollin e vendit, pas raportimeve për arrestimin e presidentit Umaro Sissoco Embaló.
Burime qeveritare konfirmuan për BBC se presidenti është ndaluar, pas të shtënave në kryeqytetin Bissau. Pak orë më vonë, oficerët dolën në televizionin shtetëror, duke shpallur pezullimin e procesit zgjedhor.
Ata thanë se do të udhëheqin vendin “deri në një njoftim të dytë”. Zgjedhjet presidenciale u zhvilluan të dielën, por kandidati kryesor i opozitës u skualifikua, duke ndezur tensione, raporton BBC.
Presidenti Embaló dhe rivali i tij Fernando Dias pretendonin të dy fitoren, me rezultatet që priteshin të enjten. Të mërkurën, dëshmitarët raportuan të shtëna rreth orës 13:00 dhe qytetarët u futën në panik, duke kërkuar strehim.
Gjenerali Denis N’Canha njoftoi formimin e “Komandës së Lartë Ushtarake për Rikthimin e Rendit” dhe mbylljen e kufijve.
Përveç presidentit, janë arrestuar edhe drejtues të ushtrisë dhe disa ministra. Guinea-Bissau ka histori të gjatë trazirash, me nëntë grusht-shtete ose tentativa për grusht shteti, që nga viti 1980.