Fatjon Dauti, autori i dyshuar i plagosjes së 29 vjeçarit Jakup Aga, pasditen e djeshme në Krumë të Hasit, është vetëdorëzuar. Policia e Shtetit bën me dije se pas një pune intensive kërkimore, pamundësisë për t’u fshehur dhe negociatave me familjarët, Dauti është vetëdorëzuar.
Specialistët e Sektorit për Krimet e Rënda në DVP Kukës, në bashkëpunim me Specialistët për Hetimin e Krimeve në Komisariatin e Policisë Has, bënë arrestimin e 30 vjeçarit për veprat penale “Plagosja e rëndë me dashje” dhe “Mbajtja pa leje e armëve dhe municioneve luftarake”.
Arrestimi i tij u bë pasi, më datë 08.09.2026, në rrugën e quajtur “Kryqëzimi i Spitalit”, në Krumë, pas një konflikti për motive të dobëta, dyshohet se ky shtetas ka plagosur me armë zjarri, në këmbë, shtetasin Jakup Aga, 28 vjeç, i cili ndodhet jashtë rrezikut për jetën.
Pas ngjarjes, autori i dyshuar është larguar nga vendi i ngjarjes. Si rezultat i punës së pandërprerë të Policisë dhe negociatave me familjarët e tij, shtetasi Fatjon Dauti është vetëdorëzuar në Drejtorinë Vendore të Policisë Kukës.
Ai ka dorëzuar edhe armën e zjarrit, e dyshuar si arma e përdorur në kryerjen e plagosjes, e cila u sekuestrua në cilësinë e provës materiale. Veprimet procedurale vijojnë nën drejtimin e Prokurorisë, për dokumentimin e plotë të ngjarjes./et