Analisti Preç Zogaj e cilësoi profilin e Wendt si tepër të rëndësishëm për marrëdhëniet mes dy vendeve, duke theksuar përvojën e tij të gjatë ushtarake dhe njohjen e zhvillimeve në rajon.
“Ai e njeh shumë mirë situatën në Shqipëri. Është gjeneral që ka përvojë të madhe mbi supe. Prioritetet që ka paraqitur nuk janë personale, por burojnë nga Departamenti i Shtetit dhe administrata e Presidentit Trump”, u shpreh Zogaj.
Sipas tij, axhenda amerikane ndaj Shqipërisë tregon vazhdimësi institucionale dhe fokus të fortë te shteti i së drejtës, siguria dhe lufta kundër krimit të organizuar. Zogaj theksoi se administrata Trump ka përcaktuar objektiva të qarta për Tiranën zyrtare, ku ndër prioritetet kryesore mbetet forcimi i institucioneve të reja të drejtësisë.
Ai nënvizoi gjithashtu se ardhja e Eric Wendt në Tiranë shihet si një sinjal i fortë mbështetjeje për SPAK-un dhe strukturat e drejtësisë, të cilat aktualisht po hetojnë çështje të rëndësishme të korrupsionit dhe krimit të nivelit të lartë.
Sipas Zogajt, prania e një diplomati me profil të lartë dhe eksperiencë në siguri pritet të ketë ndikim të rëndësishëm në raportet Shqipëri-SHBA dhe në zhvillimet politike e institucionale në vend./A.D