Rusia dhe Shtetet e Bashkuara kanë diskutuar mundësinë e një shkëmbimi të ri të të burgosurve, ka deklaruar Kirill Dmitriev, i dërguari i posaçëm i presidentit rus Vladimir Putin, në një intervistë për Axios.
“Isha takuar me disa zyrtarë amerikanë dhe anëtarë të ekipit të Trump për çështje humanitare, siç janë mundësitë për shkëmbime të të burgosurve, për të cilat pala amerikane po punon,” citoi Axios deklaratën e Dmitriev.
Një zyrtar amerikan konfirmoi informacionin, duke thënë se SHBA-ja ishte e hapur ndaj diskutimeve, por paralajmëroi se asgjë nuk ishte e afërt për t’u finalizuar.
Më herët këtë vit, administrata e presidentit Donald Trump siguroi lirimin e mësuesit amerikan Marc Fogel dhe të balerinës ruso-amerikane Ksenia Karelina. Në gusht 2024, SHBA dhe Rusia realizuan shkëmbimin më të madh të të burgosurve që nga Lufta e Ftohtë, duke liruar 24 persona, mes tyre gazetarin amerikan Evan Gershkovich dhe ish-marinsin Paul Whelan.
Sipas Axios, Dmitriev e ka diskutuar idenë e shkëmbimit të fundit me të dërguarin amerikan Steve Witkoff dhe zyrtarë të tjerë të administratës. Raporti shton se Moska shpreson që një shkëmbim i ri të tregojë vullnet të mirë dhe të ndërtojë besim mes dy vendeve. As Dmitriev dhe as zyrtari amerikan nuk dhanë detaje se cilët të burgosur mund të përfshiheshin në një marrëveshje të mundshme.
Shtëpia e Bardhë nuk ka komentuar ende mbi raportimet./MXH