Rusia ka kërcënuar të nisë një valë të re “sulmesh sistematike” kundër Kievit, disa ditë pasi kreu një nga sulmet e saj më të mëdha në kryeqytetin ukrainas që nga fillimi i luftës.
Sulmet e reja do të synojnë “qendrat e vendimmarrjes dhe postet komanduese”, së bashku me uzinat e prodhimit të dronëve në qytet, tha ministria e jashtme e Rusisë në një deklaratë.
Moska u ka bërë thirrje shtetasve të huaj dhe diplomatëve që të largohen nga Kievi “sa më shpejt të jetë e mundur” dhe i ka paralajmëruar qytetarët të qëndrojnë larg ndërtesave administrative dhe ushtarake.
Sulmet në shkallë të gjerë ruse të shtunën në mbrëmje vranë katër persona dhe plagosën rreth 100 të tjerë në Kiev dhe zona të tjera, tha presidenti ukrainas Volodymyr Zelensky.
Moska tha se breshëria dhe kërcënimet për sulme të mëtejshme ishin në përgjigje të asaj që ajo pretendon se ishte një sulm i qëllimshëm ukrainas në një konvikt studentor në qytetin Starobilsk të premten, në të cilin zyrtarët rusë thanë se 21 persona u vranë.
Ushtria ukrainase tha se forcat e saj kishin goditur një njësi elitare ushtarake ruse me dronë në zonë, në Ukrainën lindore të pushtuar nga Rusia, dhe nuk kishin shënjestruar civilë.
Rusia ka nisur disa valë sulmesh vdekjeprurëse me raketa dhe dronë ndaj Kievit që kur një armëpushim i shkurtër, që përkoi me paradën vjetore të Ditës së Fitores në Moskë, skadoi më herët në maj.
Menjëherë pas kësaj, sulmet ruse në Kiev vranë 24 persona, përfshirë tre fëmijë, në një bllok apartamentesh.
Qyteti më pas pësoi një nga sulmet më të mëdha ajrore të luftës gjatë natës së të shtunës.
Videot e postuara në mediat sociale treguan shpërthime që ndriçuan qiellin gjatë gjithë natës, dhe shumë banorë të Kievit raportuan shpërthime që tronditën qytetin, ndërsa u goditën shumë objektiva civile.
Rusia përdori dhjetëra raketa balistike dhe raketa lundrimi dhe qindra dronë për të goditur kryeqytetin, si dhe qëlloi një raketë hipersonike Oreshnik me aftësi bërthamore në zonën e Bila Tserkva, 90 km në jug të Kievit.
Objektiva jo-ushtarake si Muzeu i Çernobilit në lagjen historike të Kievit dhe Muzeu Kombëtar i Artit të Ukrainës u dëmtuan ose u shkatërruan. Një qendër tregtare, një treg dhe disa ndërtesa banimi në zonën e Lukanivkës u shkatërruan gjithashtu.
Shumë njerëz po e interpretojnë paralajmërimin e Rusisë për shtetasit e huaj që të largohen nga Kievi si një formë presioni psikologjik.
Rusia tashmë kryen sulme në shkallë të gjerë në kryeqytet, dhe e ka bërë këtë që kur nisi pushtimin e saj në shkallë të plotë të Ukrainës në vitin 2022.
Por katër vjet e gjysmë lufte e kanë mësuar Ukrainën të zhvillojë dhe të përforcojë një sistem të sofistikuar dhe të shumëfishtë të mbrojtjes ajrore.
Tani ajo kap një pjesë të madhe të dronëve dhe raketave – megjithëse Rusia shpesh i qëllon ato në numër kaq të madh sa i mposhtin mbrojtjet ajrore dhe shumë prej tyre ia dalin mbanë.
Ukraina gjithashtu mbetet shumë e varur nga sistemet e huaja të mbrojtjes ajrore për kapjen e raketave.
Në mars, Zelensky paralajmëroi se vendi i tij do të përballet me një deficit të armëve të tilla për shkak të luftës së SHBA-së dhe Izraelit me Iranin./mxh