Rusia ka ndërmarrë një valë të gjerë sulmesh ajrore gjatë natës ndaj Ukrainës, duke lëshuar rreth 160 dronë dhe një raketë të lëshuar nga droni, sipas Forcave të Armatosura ukrainase. Sulmet kanë shkaktuar viktima dhe dhjetëra të plagosur në disa qytete, ndërsa janë dëmtuar ndërtesa banimi, objekte tregtare dhe infrastruktura kritike.
Në Kiev, një sulm me dron në distriktin Dniprovskyi shkaktoi zjarr në një pallat nëntëkatësh, i cili u evakuua. Tetë persona u plagosën, mes tyre një 64-vjeçar dhe një 57-vjeçare me djegie, si dhe një 23-vjeçare me plagë nga copëzat e shpërthimit.
Në Zaporizhzhia, një nënë e re dhe djali i saj 10-vjeçar mbetën të plagosur nga sulmet ruse. Edhe qytete të tjera, përfshirë Dnipro dhe Odesa, u goditën gjatë së enjtes dhe natës drejt së premtes. Sulmet ruse kanë synuar gjithnjë e më shumë qendra logjistike, magazina dhe objekte të infrastrukturës kritike.
Në Dnipro u raportuan tre sulme të veçanta gjatë së enjtes, ndërsa një magazinë ushqimore u godit, duke shkaktuar viktima dhe pesë të plagosur. Ndërkohë, në rajonin e Kievit, një tjetër sulm me dron vrau një person dhe plagosi dy të tjerë. Sipas autoriteteve lokale, u dëmtuan 17 objekte në distriktet Bucha, Fastiv dhe Obukhiv.
Një prej sulmeve më të rënda u regjistrua në Pavlohrad, në juglindje të Ukrainës, ku një goditje ruse ndaj një qendre tregtare la të paktën pesë persona të vrarë dhe 67 të plagosur, mes tyre edhe fëmijë. Autoritetet thanë se u shkatërruan dyqane, njësi tregtare dhe automjete, ndërsa një pjesë e rrugës në qendër të qytetit u dëmtua rëndë. Rreth 90% e objekteve të dëmtuara ishin biznese.
Sulme të tjera u raportuan në Kramatorsk, pranë vijës së frontit, ku Rusia hodhi gjashtë bomba ajrore mbi zona të banuara, duke plagosur 23 persona, mes tyre edhe një fëmijë.
Ukraina godet rafinerinë e naftës në Saratov
Ndërkohë, Ukraina ka ndërmarrë sulme me dronë ndaj objektivave në territorin rus. Një prej objektivave ishte rafineria e naftës në Saratov, ndërsa një tjetër sulm shkaktoi zjarr në qendrën logjistike të kompanisë ruse të tregtisë elektronike Ozon.
Sulmet ndaj infrastrukturës energjetike janë intensifikuar nga të dyja palët përpara dimrit. Rusia ka përqendruar sulmet kryesisht ndaj sistemeve ukrainase të energjisë dhe prodhimit të elektricitetit, ndërsa Ukraina ka synuar veçanërisht infrastrukturën ruse të naftës dhe gazit./k.m