Sara Gjordeni ka ndarë me ndjekësit një situatë shqetësuese shëndetësore që ka prekur të gjithë familjen e saj. Ish-banorja e “Big Brother VIP” ka bërë të ditur se ajo, partneri i saj, këngëtari Bardhi, si dhe vajza e tyre, Nea, po vuajnë nga një infeksion i syve.
Përmes disa publikimeve në Instagram, Sara ka treguar se shqetësimet që po përjeton janë të konsiderueshme. Ajo e ka përshkruar infeksionin si një lloj “gripi të syve”, duke pretenduar se raste të ngjashme po raportohen nga shumë persona që i kanë shkruar gjatë ditëve të fundit.
Sipas saj, simptomat mund të jenë të forta, duke përfshirë skuqje, enjtje, dhimbje dhe vështirësi në shikim. Sara ka pohuar gjithashtu se rikuperimi mund të zgjasë për javë të tëra, ndaj ka shprehur shqetësimin për përhapjen e këtij infeksioni.
Në një tjetër mesazh, ajo u është drejtuar veçanërisht prindërve, duke i këshilluar të tregojnë më shumë kujdes për kontaktet e fëmijëve me persona të tjerë.
“Ruajini fëmijët të mos prekin këdo ose të mos i puthë kushdo. S’e keni idenë sesa persona më shkruajnë në ditë për këtë gjë. Dukshëm është diçka në masë”, ka shkruar Sara, duke përmendur ndër të tjera dhimbjen, djegien dhe enjtjen në zonën përpara veshëve.
Ajo ka treguar gjithashtu se kjo situatë është arsyeja pse po përpiqet të mbajë syzet dhe të shmangë ekspozimin e syve.
Çfarë duhet pasur parasysh?
Konjuktiviti është një inflamacion i syrit që mund të shkaktohet nga viruse, baktere ose faktorë të tjerë dhe disa forma të tij janë ngjitëse. Megjithatë, simptomat dhe kohëzgjatja ndryshojnë nga një person te tjetri, ndaj përshkrimet e bëra në rrjetet sociale nuk mjaftojnë për të përcaktuar diagnozën apo për të konfirmuar përhapjen e një epidemie.
Dhimbja e fortë e syve, enjtja e theksuar ose turbullimi i shikimit kërkojnë vlerësim të menjëhershëm mjekësor./mxh