Last Updated on 06/04/2026 by Anisa
Deputeti i Partisë Socialiste, Erion Braçe ka reaguar publikisht pas zhvillimit të takimeve të strukturave të PS në njësinë nr. 5 në Tirana. Në një mesazh të gjatë, Braçe shfaqet kritik ndaj mënyrës së organizimit brenda partisë, duke e cilësuar të gabuar praktikën e largimit të deputetëve nga zonat ku ata kanë krijuar lidhje të drejtpërdrejta me qytetarët.
“Kjo mania për të shkulur deputetin nga zona – me arsyen se krijon lidhje njerëzore e mezi shkulet pastaj, është gabim. Jo për deputetin, por për njerëzit,” – shprehet ai.
Deputeti socialist thekson se marrëdhënia me qytetarët kërkon kohë dhe qëndrueshmëri, ndërsa lëvizjet e shpeshta dëmtojnë besimin dhe punën në terren. Ai kritikon gjithashtu zëvendësimin e deputetëve të zgjedhur me atë që e quan “drejtorokraci”, duke paralajmëruar se kjo sjell demotivim tek strukturat e partisë.
Braçe ndalet edhe te mungesa e tij në takimet e fundit në njësinë 5, duke ngritur pikëpyetje mbi vendimmarrjen brenda partisë.
“Nuk e kuptoj këtë histori që një udhëheqës shkon bën mbledhje në njësinë 5 pa deputetin,” – shprehet ai.
Në reagimin e tij, Braçe sqaron se nuk është kundër Ogerta Manastirliu, por synon të ofrojë një alternativë tjetër për Partinë Socialiste dhe për qytetin.
“Nuk jam kundër Ogertës; thjesht dua t’i jap PS dhe qytetit një alternativë tjetër,” – thekson ai, duke shtuar se debati i brendshëm duhet të jetë në funksion të përmirësimit të qeverisjes dhe përfaqësimit të qytetarëve.
Reagimi i plotë;
#TiranaEmadhe nisur nga #5sa Java e mirë e #Pashkës dhe hudhra që nuk duhet! Ishte realisht një javë e mirë; mbyllet sot dhe dua t’i them disa fjalë: Shumë faleminderit edhe një herë për gjithë mesazhet, telefonatat – përkrahjen, mbështetjen, vlerësimet, gatishmërinë për të punuar bashkë;
Shumë faleminderit posaçërisht socialistëve të asambleve të PS me të cilët u takova e shtrengova duart këtë javë;
Ju jam shumë mirënjohës! Faleminderit gjithashtu për urimet e ditës së lindjes edhe pse kam kohë që kujtoj ngjarjet e jetuara në një vit më shumë se sa numrat! Urimet për Pashkë i kemi bashkë, e kjo javë, me Bajramin që i parapriu, Pashkën Ortodokse që pason, është përshkrimi prej Zotit i asaj që jemi në një dimension; Kështu që gezuar kujtdo!
Tani hudhra e javës! Një histori e parë që përsëritet e më ndjek nga mbrapa nga Lushnja e Divjaka; një histori deliri dhe e padenjë, tërësisht jo produktive e që kërkon të ndërtojë madhështinë qesharake, gjithnjë duke më ndjekur pas.
Shikoni;
Kjo mania për të shkulur deputetin nga zona – me arsyen se krijon lidhje njerëzore e mezi shkulet pastaj, është gabim; Jo për deputetin, por për njerëzit! Paqëndrueshmëria në marrëdhënie me ta, është mungesë serioziteti dhe dëmton punën. Politika është punë me njerëzit, marrëdhënie besimi që nuk vendoset me orë, as ditë por merr vite! Po flas për deputetët që territorin e kanë punë, as zyrë, as mburrje, as delegim për njerëz pa mandat, pa njohje, pa dije e pa ndikim kund!
Thënë kjo, të zëvendësosh deputetin e votuar nga njerëzit me drejtorokracinë, është e pamend, sado elegant të jetë emri që i vëmë; tërësisht e pamend në raport me qëllimet që ke, veçanërisht kur delegon pushtet partiak tek ta, për të kapërcyer deputetin; veçanërisht kur harron që një arsye pse punëtorë partie demotivohen është drejtorokracia e padurueshme.
Në fund, kjo paranoja “Erionin e kemi kundër”, pasuar me këtë “markimin” që kurrë s’u bë karburanteve – fjala bie, por njerëzve ju bëhet, është qesharake, sinqerisht! Ua thashë edhe në Asamblenë e 5 ses – nuk jam kundër Ogertës; thjesht dua t’i jap PS dhe qytetit që nuk po qeveriset e nuk shërben, një alternativë tjetër; Më thjeshtë se kaq nuk ka!