Një dërgesë ndihmash humanitare nga Egjipti mbërriti të enjten në portin e Beirutit, ndërsa përshkallëzohen përplasjet mes Izraelit dhe Hezbollahut, në sfondin e luftës së SHBA-së dhe Izraelit kundër Iranit.
Dërgesa u mirëprit nga ministrat libanezë dhe u shoqërua me një konferencë të përbashkët për shtyp, ku ministri i Jashtëm egjiptian, Badr Abdelatty, theksoi mbështetjen e vendit të tij për ushtrinë libaneze dhe sovranitetin e Libanit mbi të gjithë territorin.
Përveç ndihmave humanitare, situata mbetet e tensionuar në jug të Libanit, ku Izraeli dhe Hezbollah po përplasen në vijën e frontit pranë lumit Litani, ndërsa mbi 1 milion njerëz janë zhvendosur dhe më shumë se 1,000 kanë humbur jetën, përfshirë fëmijë, gra dhe mjekë.
Egjipti deklaroi se kjo dërgesë është vetëm fillimi dhe është i gatshëm të plotësojë kërkesat e Libanit brenda kuadrit të solidaritetit arab./mxh